
काठमाडौं। साताको पहिलो दिन आइतबार सेयर बजारका सबै सूचकमा गिरावट आएको छ। नेप्से परिसूचक अघिल्लो कारोबार दिनको तुलनामा २७.५९ अंकले घटेर २६१४ विन्दुमा कायम भएको छ। बजारसँगै कारोबार रकममा पनि उल्लेख्य कमी देखिएको छ।
गत मंगलबार ८ अर्ब ३६ करोड रुपैयाँको सेयर कारोबार भएकोमा आज आइतबार त्यो रकम घटेर ६ अर्ब ६९ करोडमा सीमित भएको छ। बजारमा आज कुल ३४ कम्पनीको सेयर मूल्य बढ्दा २२० कम्पनीको मूल्य घटेको छ भने ७ कम्पनीको मूल्य स्थिर रह्यो।
समूहगत रूपमा हेर्दा आज सबै उपसूचकहरू राताम्मे भएका छन्। व्यापार समूह सबैभन्दा धेरै ३.५९ प्रतिशतले घट्यो भने जलविद्युत् १.८१ र विकास बैंक १.४१ प्रतिशतले ओरालो लागे। बैंकिङ, फाइनान्स, होटल तथा पर्यटन, लगानी, र बीमा लगायतका सबै क्षेत्रमा गिरावट आएको छ।
यस्तो गिरावटको बीचमा पनि साल्पा विकास बैंकको सेयर मूल्यमा १० प्रतिशतको वृद्धि देखिएको छ। रिलायन्स स्पिनिङ मिल्स, कालिका लघुवित्त र मञ्जुश्री फाइनान्सका लगानीकर्ताले पनि केही कमाएका छन्। अर्कोतर्फ, बुद्धभूमि नेपाल हाइड्रोपावरको मूल्य सबैभन्दा धेरै ८.९२ प्रतिशतले घट्यो भने रिडी पावर र अरुणखोला जलविद्युत्का लगानीकर्ताले पनि बढी गुमाएका छन्।
आजको बजारमा आँखुखोला जलविद्युत्, रिडी पावर, एसवाई प्यानल र ङादी ग्रुप लगायतका कम्पनीहरूको सर्वाधिक कारोबार भएको छ।

























