
काठमाडौं । सर्वोच्च अदालतले मेडिकल व्यवसायी दुर्गा प्रसाईंले दायर गरेको बन्दी प्रत्यक्षीकरण निवेदनमाथि सुनुवाइ गर्दै सम्बन्धित मुद्दाको फाइल झिकाउन आदेश दिएको छ।
न्यायाधीशद्वय नहकुल सुवेदी र मेघराज पोखरेलको संयुक्त इजलासले महान्यायाधिवक्ताको कार्यालयबाट उक्त फाइल उपलब्ध गराउन आदेश जारी गरेको हो। जिल्ला प्रहरी परिसरले बुझाएको लिखित जवाफको अध्ययनपछि अदालतले थप प्रमाणका लागि फाइल झिकाउने निर्णय गरेको बताए।
प्रसाईंलाई प्रहरीले फागुन २१ मा हुन लागेको निर्वाचन विथोल्ने अभियान सञ्चालन गर्न लागेको आशंकामा पटक-पटक नियन्त्रणमा लिँदै आएको छ।
यसअघि माघ ५ मा पोखराबाट पक्राउ परेका उनलाई बयानपछि छाडिएको थियो भने माघ २३ मा पनि पक्राउ गरी हाजिर जमानीमा मुक्त गरिएको थियो। निर्वाचनबारे उनले दिएका अभिव्यक्तिलाई आधार बनाएर साइबर ब्यूरोले अनुसन्धान गरिरहेको प्रहरीले जनाएको छ।

























