
विराटनगर । विराटनगरमा भएको ‘अनिल–मीन’ एक दिवसीय क्रिकेट प्रतियोगिताको उपाधि सुनसरीले जितेको छ ।
नेपाल क्रिकेट फाउन्डेसनले आयोजना गरेको प्रतियोगितामा सुनसरीले मोरङलाई ७४ रनले हराउँदै उपाधि जितेको हो । सुनसरी र मोरङबीच भएको ‘बेस्ट अफ ३’ को सिरिजमा सुनसरीले २ खेल जित्यो भने मोरङले १ खेलमा मात्रै जित निकाल्न सफल भयो । ५० ओभरको खेल भए पनि मौसमका कारण ओभर घटाएर ४० ओभरको मात्रै खेलाइएको थियो ।
मोरङ टस जितेर बलिङ रोज्दै पहिलो ब्याटिङको अवसर सुनसरीलाई दिएको थियो । पहिलो ब्याटिङको मौका पाएको सुनसरीले ४० ओभर खेल्दै सबै विकेटको क्षतिमा १ सय ४६ रनको चुनौती प्रस्तुत गर्यो । सुनसरीका रबिन मण्डलले ८१ रन र रोशन घिमिरेले १० रन बनाए । मोरङका कृश शर्माले ३ विकेट, कृतिक कामतले २ विकेट तथा प्रतीक पोखरेल, यथार्त बचन यादव र अमर यादवले समान १–१ विकेट लिए ।
मोरङ पाएको १ सय ४७ रनको लक्ष्य पछ्याउने क्रममा २७ ओभर ४ बलमा सबै विकेट गुमाउँदै ७२ रनमै समेटियो । मोरङका प्रतीक पोखरेलले १९ रन र कृश शर्माले १२ रन बनाए । सुनसरीका कविराज खत्रीले ५ विकेट, रबिन मण्डलले ३ विकेट र गौरव कटवालले १ विकेट लिए । खेलको प्लेयर अफ म्याच सुनसरीका रबिन मण्डल भए ।
त्यस्तै, प्लेयर अफ सिरिज सुनसरीका कविराज खत्री, उत्कृष्ट ब्याटर सुनसरीकै रबिन मण्डल, उत्कृष्ट बलर मोरङका कृश शर्मा भए भने उदयमान खेलाडी सुनसरीका अब्दुल रफा भए ।
खेलाडीहरूलाई पूर्वखेलाडीद्वय अनिल श्रेष्ठ र मीन दाहाल तथा कोशी प्रदेश क्रिकेट संघका अध्यक्ष सर्वजितराज पाण्डे, मोरङ क्रिकेट संघका अध्यक्ष महमद साद बाबु, सुनसरी क्रिकेट संघका अध्यक्ष सिपी पौडेल, फाउन्डेसनका अध्यक्ष अभिषेक श्रेष्ठलगायतले पुरस्कार प्रदान गरे ।

























