चेक अनादार प्रकरणमा पक्राउ परेका सेफ सन्तोष साह रकम बुझाएपछि छुटे

काठमाडौं । चेक अनादार प्रकरणमा पक्राउ परेका चर्चित सेफ सन्तोष साह सोमबार बेलुका रिहा भएका छन् । पीडित पक्षलाई चेकअनुसारको रकम बुझाएपछि उनी छुटेका हुन् ।

प्रहरी स्रोतका अनुसार साहले पीडित पक्षलाई ४ लाख रुपैयाँ भुक्तानी गरेपछि रिहाइको प्रक्रिया अघि बढाइएको हो । उनीमाथि काठमाडौंको गैरीधारास्थित एक रेस्टुरेन्ट खरिदका क्रममा पर्याप्त रकम नभएको बैंक खाताको चेक दिएको आरोप लागेको थियो ।

Advertisement

यस घटनासँग सम्बन्धित विवादमा शकुन्तला अधिकारी थापाले साहविरुद्ध २५ लाख रुपैयाँको चेक अनादर मुद्दा दायर गरेकी थिइन् । उक्त मुद्दामा जिल्ला अदालत काठमाडौंले गत वर्ष जेठमै साहलाई दोषी ठहर गर्दै २५ लाख रुपैयाँ बिगो भराउने फैसला सुनाएको थियो । अदालतले उनलाई एक महिना कैद र १ लाख २५ हजार रुपैयाँ जरिबानासमेत तोकेको थियो ।

तर, फैसला सुनाइँदा साह अदालतमा उपस्थित नभएका कारण उनी फरार सूचीमा थिए । त्यसपछि पीडित पक्षले पुनः ४ लाख ५० हजार रुपैयाँ ठगी गरेको आरोप लगाउँदै प्रहरीमा जाहेरी दिएको थियो ।

सोही जाहेरीका आधारमा काठमाडौं उपत्यका अपराध अनुसन्धान कार्यालयको टोलीले साहलाई गत शुक्रबार राति जनकपुरबाट पक्राउ गरेको थियो । पक्राउपछि उनलाई काठमाडौं ल्याएर आवश्यक कानुनी प्रक्रिया अघि बढाइएको थियो ।

पीडित पक्षसँग रकम सम्बन्धी विषय मिलापत्र भएपछि साह सोमबार बेलुका रिहा भएका हुन् । चेक अनादारसम्बन्धी पुरानो अदालतको फैसला भने यथावत् रहेको छ ।