चिया पसलको गल्लामा लुकाएर गाँजा बेच्ने एक जना पक्राउ

विराटनगर । मोरङको धनपालथान गाउँपालिका–४ कर्सियाको चिया पसलमा लागुऔषध गाँजाको अवैध कारोबार गर्ने एक व्यक्तिलाई प्रहरीले पक्राउ गरेको छ।

धनपालथान–४ कर्सियाका ४० वर्षीय गोपाल सहनीलाई पक्राउ गरिएको मोरङ प्रहरीका प्रवक्ता डीएसपी मकेन्द्रकुमार मिश्रले जानकारी दिए । उनका अनुसार विशेष सूचनाका आधारमा प्रहरी चौकी कर्सियाको टोलीले सहनीको चिया पसलमा छापा मार्दा बिक्रीका लागि लुकाएर राखिएको ८ सय ग्राम गाँजा बरामद गरेको हो ।

Advertisement

सहनीले चिया पसलको गल्ला (पैसा राख्ने बाकस) भित्र गाँजाका स-साना पोका बनाएर लुकाई छिपाइ राखेको अवस्थामा प्रहरीले फेला पारेको थियो । पसलबाट गाँजासँगै नेपाली नगद पनि फेला परेको छ।

‘चिया पसलबाटै लागुऔषध गाँजा बिक्री भइरहेको छ भन्ने विशेष सूचना पाएपछि प्रहरी टोली खटाएका थियौँ,’ डीएसपी मिश्रले भने, ‘खानतलासी गर्दा गल्लाभित्रै स-साना पोका बनाएर राखिएको गाँजा बरामद भयो ।’

पक्राउ परेका सहनीलाई थप अनुसन्धान र कानुनी कारबाहीका लागि इलाका प्रहरी कार्यालय रंगेलीमा राखिएको प्रहरीले जनाएको छ। उनीमाथि लागुऔषध नियन्त्रण ऐन अन्तर्गत मुद्दा चलाउने तयारी भइरहेको प्रहरीले जनाएको छ।