विराटनगरमा दिनबन्धु गोयल सम्मानित

विराटनगर । बालबालिकाको शिक्षामा उल्लेखनीय योगदान पुर्‍याएका वरिष्ठ समाजसेवी दिनबन्धु गोयल विराटनगरमा सम्मानित भएका छन् ।

ओमेन्स क्रिएशन ट्युसन सेन्टरले बुधबार आयोजित विशेष कार्यक्रममा गोयललाई ‘शिक्षा सम्मान’ प्रदान गरेको हो । सेन्टरकी अध्यक्ष तथा शिक्षासेवी पुनम जाजोदियाले उनलाई सम्मानपत्र प्रदान गरिन् ।

गोयलले ट्युसन सेन्टरमा अध्ययनरत १० जना विपन्न बालबालिकाको पाँच वर्षसम्मको अध्ययन खर्चका लागि १२ लाख १ हजार रुपैयाँ सहयोग गरेपछि उनको योगदानको कदर गर्दै सम्मान गरिएको सेन्टरले जनाएको छ । विराटनगर महानगरपालिका–१० मा सञ्चालित ओमेन्स क्रिएशन ट्युसन सेन्टरमा हाल ४० भन्दा बढी बालबालिका अध्ययनरत छन् ।

तीमध्ये १० जनाको शैक्षिक खर्च गोयलको आर्थिक सहयोगबाट व्यवस्थापन भइरहेको छ । कार्यक्रममा कोशी अस्पतालमा निःशुल्क दिवा भोजन सेवा सञ्चालन गर्दै आएका नरसेवा नारायण सेवाका संयोजक तथा समाजसेवी पृथ्वीकुमार अग्रवाल, नेपाल अग्रवाल सभा विराटनगरका पूर्वअध्यक्ष तथा उद्योगी देवकिनन्दन अग्रवाललगायत विभिन्न क्षेत्रका व्यक्तित्वको उपस्थिति रहेको थियो ।

ओमेन्स क्रिएशन ट्युसन सेन्टरले समाजसेवी तथा उद्योगीहरूको सहयोगमा विपन्न बालबालिकालाई शैक्षिक अवसर उपलब्ध गराउँदै आएको छ । सेन्टरमा विराटनगरका विभिन्न औद्योगिक घरानाका महिलाहरूले नियमित रूपमा अध्यापनमा सहयोग गर्दै आएका छन् ।