मोरङको रतुवामाईमा मिनी ट्रकबाट एक मेट्रिक टनभन्दा बढी गाँजा बरामद

विराटनगर । मोरङको रतुवामाईमा मिनी ट्रकबाट एक हजार किलो अर्थात् एक मेट्रिक टनभन्दा बढी गाँजा बरामद भएको छ । रतुवामाई नगरपालिका–१० सोमबारेबाट शुक्रबार दिउँसो २ः३० बजेतिर गाँजा बरामद भएको हो ।

इलाका प्रहरी कार्यालय सिजुवाका इन्स्पेक्टर कैलाश लिम्बू र सशस्त्र प्रहरी बल नेपाल सीमा सुरक्षा गुल्म चुनीबारीका डीएसपी विकाशकुमार भुजेल नेतृत्वको संयुक्त टोलीले १ हजार ३३ किलो गाँजा बरामद गरेको छ । मोरङ प्रहरी प्रमुख एसपी कवित कटवालका अनुसार उर्लाबारीबाट आमबारीतर्फ आउँदै गरेको को १ ख ४३७३ नम्बरको मिनी ट्रकमा गाँजा रहेको विशेष सूचना आएपछि नियन्त्रणमा लिन नेपाल र सशस्त्र प्रहरीको संयुक्त टोली खटिएको थियो ।

संयुक्त टोलीले रोकेर चेकजाँच गर्दा ट्रकको पछाडि धानको भुसको बोरामुनि कालो प्लाष्टिकमा प्याक गरेर राखिएको ३१ वटा पोका फेला परेको थियो । पोका खोलेर हेर्दा तयारी गाँजा रहेको पाइएको एसपी कटवालको भनाइ छ । उनका अनुसार तौल गर्दा एक हजार ३३ किलो भएको छ ।

प्रहरीले गाँजा बरामद गर्दै मिनी ट्रकलाई नियन्त्रणमा लिएर चालक धनकुटाको पाख्रीबास नगरपालिका–९ का अन्दाजी २८ वर्षीय उमेश तामाङलाई पक्राउ गरेको छ । बरामद भएको गाँजा, नियन्त्रणमा लिइएको ट्रक र पक्राउ परेका चालकलाई इलाका प्रहरी कार्यालय सिजुवामा राखेर विस्तृत अनुसन्धान अघि बढाइएको जानकारी एसपी कटवालले दिए ।

प्रहरीका अनुसार उक्त गाँजा धनकुटाबाट ल्याएर भारततर्फ लैजान खोजिएको हुन सक्छ । केही दिनयता तराईमा साम्प्रदायिक हिंसा बढ्दै गएको । सुरक्षाकर्मी परिस्थिति नियन्त्रणमा व्यस्त छन् । त्यही मौका छोपेर गाँजा तस्करी गर्दै भारत कटाउन खोजिएको हुनसक्ने प्रहरीले जनाएको छ । प्रहरीका अनुसार विस्तृत कुरा अनुसन्धानपछि पत्ता लाग्नेछ ।