२०८३ भाद्र २०, शनिबार १०:१०
म्यानिटोबा । क्यानाडाको म्यानिटोबा प्रान्तीय सरकारले नेपालका विनाशकारी बाढीपीडितका लागि ‘नेप्लिज कल्चरल सोसाइटी अफ म्यानिटोबा’ मार्फत् ५० हजार क्यानेडियन डलर सहयोग उपलब्ध गराउने घोषणा गरेको छ।
उक्त प्रान्तकी खेलकुद, संस्कृति, सम्पदा तथा पर्यटन मन्त्री नेली केनेडीले सो सहयोग राशिको घोषणा गरेकी हुन्। आफू बसिरहेको प्रान्तले विपत्मा परेका देशवासीलाई सम्झिँदै राहतस्वरूप रकम सहयोग गर्ने घोषणा गरेपछि म्यानिटोबामा रहेका नेपालीहरू खुसी छन्।
म्यानिटोबामा बस्दै आएका थुप्रै नेपालीका परिवार, आफन्त र साथीभाइ भोटेकोशी बाढीको वितण्डाबाट प्रभावित भएको तथ्य मनन गर्दै मन्त्री केनेडीले संकटको यस घडीमा म्यानिटोबा सरकार यहाँको नेपाली समुदाय र नेपालका जनताको साथमा रहेको बताएकी छन्।
नेपालको भोटेकोशी नदीमा आएको भीषण बाढीका कारण ठूलो धनजनको क्षति भएको छ। बाढीमा परी १२ सयभन्दा बढी मानिसको मृत्यु भइसकेको छ भने हजारौँ बेपत्ता छन्। बाढीले घरजग्गा, सडक तथा पूर्वाधारमा क्षति पुर्याउनुका साथै खोज, उद्धार र राहत कार्यमा ठूलो चुनौती खडा गरेको छ।
सरकारको यस सहयोगप्रति आभार व्यक्त गर्दै नेप्लिज कल्चरल सोसाइटी अफ म्यानिटोबाका अध्यक्ष विजय ढकालले विपद्को समयमा म्यानिटोबा सरकारले देखाएको सहानुभूति र ऐक्यबद्धता अत्यन्तै सराहनीय रहेको बताएका छन्।
मन्त्री केनेडीका अनुसार उक्त रकम नेप्लिज कल्चरल सोसाइटी अफ म्यानिटोबाद्वारा सञ्चालित राहत सङ्कलन अभियानमार्फत प्रभावित क्षेत्रका पीडितहरूलाई सहायता पुर्याउन र पुनरुत्थानका कार्यमा उपयोग गरिनेछ।
यस्तै, युनिभर्सिटी अफ विनिपेगमा प्राध्यापन गर्दै आएका डा. ज्ञानेन्द्र पोखरेलले नेपालका बाढीपीडितका लागि थप करिब ७ हजार क्यानेडियन डलर संकलन भइसकेको जानकारी दिँदै थप सहयोगका लागि स्थानीय विश्वविद्यालय, संघसंस्था तथा व्यवसायीहरूसँग अनुरोध गरिरहेको जनाएका छन्।
-नेपालटचबाट
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×