संसदमा पुग्दै फोहोरमैला व्यवस्थापनसम्बन्धी विधेयक

काठमाडौं । सरकारले फोहोरमैला व्यवस्थापनसम्बन्धी विधेयक संघीय संसदमा दर्ता गर्ने तयारी गरेको छ। कानुनमन्त्री सोबिता गौतमले फोहोर व्यवस्थापनलाई उत्पादनदेखि अन्तिम विसर्जनसम्मको सम्पूर्ण चक्रका रूपमा सम्बोधन गर्ने गरी विधेयक तयार गरिएको बताएकी छन्।

मन्त्री गौतमका अनुसार विधेयकमा फोहोर उत्पादन न्यूनीकरणदेखि स्रोतमै वर्गीकरण, सङ्कलन, स्थानान्तरण केन्द्रसम्म ढुवानी, प्रशोधन केन्द्रमा पुनःप्रयोग तथा पुनःप्रशोधनसम्मका विषय समेटिएका छन्। यस्तै, फोहोरबाट मल, ग्यास वा ऊर्जा उत्पादन गर्ने र बाँकी फोहोरको सुरक्षित अन्तिम विसर्जन गर्ने विषयलाई पनि विधेयकमा समेटिएको उनले बताएकी छन्।

Advertisement

विधेयकमा शून्य फोहोर, चक्रीय अर्थतन्त्र र उत्पादकको विस्तारित जिम्मेवारीजस्ता आधुनिक अवधारणालाई समेत कानुनी व्यवस्थामा समेटिएको मन्त्री गौतमले जानकारी दिएकी छन्। ‘फोहोर उठाउनु मात्र समाधान होइन। फोहोर उत्पादनदेखि अन्तिम व्यवस्थापनसम्मको सम्पूर्ण चक्र व्यवस्थित गरिएको छ,’ उनले सामाजिक सञ्जालमार्फत भनेकी छन्।

प्रकृतिले नेपाललाई सुन्दर देश दिएको भए पनि सडक, नदी, बस्ती तथा सार्वजनिक स्थलमा बढ्दै गएको फोहोरले प्राकृतिक सुन्दरता, वातावरण र जनस्वास्थ्यमा चुनौती थपिरहेको मन्त्री गौतमको भनाइ छ। स्वच्छ, स्वस्थ र सुन्दर नेपाल निर्माणका लागि विधेयकलाई महत्वपूर्ण कानुनी कदमका रूपमा अघि बढाउन लागिएको उनले बताएकी छन्।