सुनसरीमा पटाका बोकेको स्कुटरलाई पछ्याउँदा प्रहरीको मोटरसाइकल दुर्घटना, सई घाइते

विराटनगर । भारतबाट पटाका ल्याउँदै गरेको स्कुटरलाई नियन्त्रणमा लिन पछ्याउने क्रममा सुनसरीमा प्रहरी चढेको मोटरसाइकल दुर्घटनामा परेको छ ।

दुर्घटनामा परेर नेपाल प्रहरीका सई (प्रहरी नायव निरीक्षक) घाइते भएका छन् । स्कुटरलाई पछ्याउने क्रममा मोटरसाइकल अनियन्त्रित भई दुर्घटना हुँदा सई रामकुमार माझी घाइते भएका हुन् ।

झापाको कनकाई नगरपालिका–९ घर भएका ३६ वर्षीय माझी प्रहरी महिला, बालबालिका तथा ज्येष्ठ नागरिक सेवा केन्द्र सुनसरीमा दरबन्दी भई हाल प्रहरी चौकी अमडुवामा कार्यरत थिए । घटना शुक्रबार दिउँसो करिब ४ बजेतिर सुनसरीको बर्जु गाउँपालिका–२ स्थित बनरुवा घाटमा भएको हो ।

भारतबाट पटाका बोकेर आउँदै गरेको स्कुटरलाई प्रहरीले पछ्याएको थियो । सोही क्रममा माझी सवार मोटरसाइकल अनियन्त्रित भएर दुर्घटनामा परेको सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।

दुर्घटनामा माझीको दाहिने काँधको हड्डी भाँचिएको छ । उनको अवस्था सामान्य रहेको र उपचारका लागि विराटनगरस्थित नोबेल अस्पतालमा भर्ना गरिएको जानकारी डीएसपी खड्काले दिए ।

प्रहरीले पटाका बोकेको को २८ प २६७६ नम्बरको स्कुटरसहित चालकलाई नियन्त्रणमा लिएको छ । स्कुटर चालक मोरङको बूढीगंगा गाउँपालिका–३ का १७ वर्षीय बालक रहेको प्रहरीले जनाएको छ । उनको साथबाट विभिन्न प्रकारका पटाका बरामद भएको छ ।

पक्राउ परेका बालक र बरामद पटाकाका बारेमा थप अनुसन्धान भइरहेको प्रहरीले जनाएको छ । बालकले पटका भारतबाट ल्याएको प्रहरीको भनाइ छ ।