
काठमाडौं । काठमाडौं र धादिङको सिमानामा पर्ने झ्याप्ले खोलामा हालसम्म २९ वटा शव भेटिएको छ । शवलाई पहिरोबाट बाहिर निकालिएको छ ।
पहिरोले पुरिएको अवस्थामा भेटिएका विंगर र बसभित्रबाट शवहरू निकालिएको प्रहरीले जनाएको छ । शनिवार साँझ १४ वटा शव निकालिएको थियो । आइतबार १५ वटा शव निकालिएको छ । अहिलेसम्म शवको संख्या २९ पुगेको हो ।
स्काभेटर लगाएर पहिरो हटाउनेक्रममा थप शवहरू भेटिन थालेको जानकारी प्रहरीले दिएको छ । उक्त पहिरोमा कतिवटा सवारी साधन पुरिएका छन् भन्नेबारे अझै यकिन हुन सकेको छैन ।
पहिरोमा शनिबार सवारी साधन पुरिएको आशंकामा खोजी र उद्धार थालिएको हो । सवारी साधन कतिबेला पुरिएका थिए भन्ने हालसम्म यकिन भएको छैन । पहिरोमा पुरिएका सवारीसाधन र शवको संख्या बढ्न सक्ने अनुमान छ ।

























