फोटो क्याप्सन : दुर्घटनास्थलमा भेला भएका प्रहरी र स्थानीय ।सुनसरी । सुनसरीको इटहरी उपहानगरपालिका–१६ बालग्राम चोकमा आइतबार दुर्घटना हुँदा एक दम्पतीको मृत्यु भएको छ ।
दुर्घटनामा परेर को ३६ प ५६३७ नम्बरको बुलेट मोटरसाइकलमा सवार संखुवासभाको धर्मदेवी नगरपालिका–३ का ३२ वर्षीय युवराज गुरुङ र उनकी पत्नी ३२ वर्षीय टीका गुरुङको मृत्यु भएको कोशी प्रदेशका ट्राफिक प्रहरी प्रमुख एसपी विनोद घिमिरेले जानकारी दिए । उनका अनुसार दुर्घटनामा गम्भीर घाइते भएका दम्पतीलाई उपचारका लागि बीपी कोइराला स्वास्थ्य विज्ञान प्रतिष्ठान धरान पुर्याउनसाथ चिकित्सकले मृत घोषित गरेका हुन् ।
पश्चिमबाट पूर्वतर्फ जाँदै गरेको मोटरसाइकललाई विपरीत दिशाबाट आउँदै गरेको को १ क ३३८८ नम्बरको टिपरले सुरुमा बिहान ११ः३० बजेतिर ठक्कर दिएको थियो । ठक्करबाट अनियन्त्रित भएर सडकमा पल्टिएको मोटरसाइकललाई टिपरको पछाडि रहेको प्रदेश १–०२–००१ ज ३८११ नम्बरको म्याजिक भेनले किचेको प्रहरीले जनाएको छ ।
दुर्घटनालगत्तै प्रहरीले म्याजिक र चालक इटहरी–१२ खनारका ३९ वर्षीय श्याम विक तथा टिपर र चालक मोरङको सुन्दरहरैँचा नगरपालिका–३ गछियाका ३५ वर्षीय सागर मग्रातीलाई नियन्त्रणमा लिएको छ । घटनाको इलाका प्रहरी कार्यालय पकलीका इन्स्पेक्टर लेखनाथ दाहाल नेतृत्वको टोलीले अनुसन्धान गरिरहेको छ ।

























