
विराटनगर । मोरङको धनपालथान गाउँपालिका–३ नुनिया टोलको पोखरीमा बुधबार बिहान एक जना महिलाको शव फेला परेको छ ।
भारतको मोजफरपुर घर भएकी ३५ वर्षीया पुनिता झाको शव सार्वजनिक पोखरीमा बिहान १०ः४५ बजेतिर फेला परेको प्रहरीले जनाएको छ । उनको माइती धनपालथान–६ हो ।
प्रहरीका अनुसार मोजफरपुर घर भए पनि उनी केही समयदेखि परिवारसहित माइतीमै बस्दै आएकी थिइन् । डुबिरहेको अवस्थामा देखेर स्थानीयले पोखरीबाट बाहिर निकालेका थिए ।
शवलाई पोस्टमार्टमका लागि रंगेली अस्पतालमा राखिएको छ । इलाका प्रहरी कार्यालय रंगेलीका इन्स्पेक्टर सन्तोषकुमार खड्का नेतृत्वको टोलीले घटनाको थप अनुसन्धान गरिरहेको छ ।

























