
काठमाडौं । परराष्ट्रमन्त्री आरजु राणा देउवाले चिनियाँ विदेशमन्त्री वाङ यीलाई नेपाल भ्रमणको निम्ता दिएकी छन् ।
चीनको छन्दु सहरमा शुक्रबार द्विपक्षीय भेटवार्ताका क्रममा उनले वाङ यीलाई नेपाल भ्रमणका लागि निमन्त्रणा दिएकी हुन् । उनले चीनको ७५ औं स्थापना दिवस र आगामी वर्ष नेपाल–चीन कूटनीतिक सम्बन्ध स्थापनाको ७० औं वार्षिकोत्सवका अवसरमा चीन सरकार र चिनियाँ नागरिकलाई बधाई दिएकी छन् ।
चिनियाँ विदेशमन्त्रीकै निमन्त्रणामा चीनको औपचारिक भ्रमणमा गएकी मन्त्री राणा प्रधानमन्त्री केपी शर्मा ओलीको आसन्न चीन भ्रमणको तयारीका सिलसिलामा छेन्दु पुगेकी हुन्। उनीहरूबीच नेपाल–चीन सम्बन्धका विविध पक्ष, आपसी हित र साझा चासोका साथै प्रधानमन्त्रीको आसन्न चीन भ्रमण र त्यस अवसरमा हुने दुई देशबीचको सहयोग आदानप्रदानका विषयमा कुराकानी भएको थियो।
दु्ई देशबीचको सम्बन्धमा उल्लेखनीय उपलब्धि हासिल भन्दै मन्त्री राणाले चीन भ्रमण गर्ने नेपालीलाई भिसा शुल्क नलाग्ने घोषणा हालै गरेकोमा त्यहाँको सरकारलाई धन्यवाद दिइन्। भेटवार्ताका क्रममा प्रधानमन्त्री ओलीको आसन्न चीन भ्रमणका क्रममा समझदारी एवं सम्झौता हुने विभिन्न आयोजना तथा सहयोग आदानप्रदानबारे छलफल भएको थियो।
ओली आगामी सोमबार चीन भ्रमणमा जाँदैछन् । शुक्रबार साँझ चिनियाँ विदेशमन्त्रीले नेपाली भ्रमण टोलीको सम्मानमा रात्रिभोजको आयोजना गरेका छन् । मन्त्री राणा शनिबार नेपाल फर्किने कार्यक्रम छ ।

























