स्वास्थ्य सचिव र अतिरिक्त सचिवको अवकाश

काठमाडौं । स्वास्थ्य तथा जनसंख्या मन्त्रालयका सचिव डा. रोशन पोखरेल र स्वास्थ्यतर्फकै अतिरिक्त सचिव डा. दीपेन्द्ररमण सिंहले सेवाबाट अवकाश पाएका छन् ।

उनीहरु सेवा र उमेर अवधिका कारण अनिवार्य अवकाशमा गएका हुन् । दुवै जनालाई स्वास्थ्य तथा जनसंख्या मन्त्रालयले आइतबार बिदाइ गरेको छ ।

डा. पोखरेल २०७८ साउन ४ गते स्वास्थ्य सचिव नियुक्त भएका हुन् । बिदाइ कार्यक्रममा स्वास्थ्य तथा जनसंख्यामन्त्री प्रदीप पौडेल तथा मन्त्रालयका जनसंख्या तर्फका सचिव हरिप्रसाद मैनालीले आगामी दिनको शुभकामना दिँदै बिदाइ गरेका छन् ।

डा. पोखरेल र डा. सिंह २०७६ फागुन १२ गते विशिष्ट श्रेणीको प्रमुख विशेषज्ञ पदमा बढुवा भएका थिए । मन्त्रालयबाट दुवै जनाको बिदाइ भएसँगै सचिव र अतिरिक्त सचिवको पद रिक्त भएको छ ।

मन्त्रालयमा कार्यरत अतिरिक्त सचिव डा. संगीता कौशल मिश्र, डा. विकास देवकोटा र डा. टंक बाराकोटी सचिवको प्रतिस्पर्धामा छन् । अतिरिक्त सचिव मिश्र बढुवाको पहिलो वरीयतामा छिन् ।

डा. देवकोटा दोस्रो र बाराकोटी तेस्रो वरीयतामा छन् । देवकोटा स्वास्थ्य सेवा विभागको महानिर्देशक हुन् । बाराकोटी मन्त्रालयकै अतिरिक्त सचिव छन् ।