
विराटनगर । नेपाल क्रिकेट संघ (क्यान) को आयोजनामा हुन गइरहेको नेपाल प्रिमियर लिग (एनपीएल) को ट्रफी टुर कोशी प्रदेशबाट सुरु हुने भएको छ।
विराटनगर किंग्सको सह आयोजनामा भदौ २१ देखि २३ गतेसम्म कोशी प्रदेशका विभिन्न स्थानमा ट्रफी टुर कार्यक्रम रहेको बताइएको छ ।
भदौ २१ गते ट्रफी विराटनगर विमानस्थलमा अवतरणपछि दिउँसो १२ बजे सिद्धार्थ बैंक लिमिटेडमा ट्रफी प्रदर्शनी गरिने छ । त्यसपछि दिउँसो १ बजेदेखि विराटनगरको महेन्द्र चौक, बरगाछी, कञ्चनबारी, ठुलो मिल, तीनपैनी हुँदै विराटनगर बजार परिक्रमा गर्दै संसारिमाईस्थानमा प्रार्थना–पूजाको कार्यक्रम रहेको छ ।
त्यसपछि बेलुकी ५ बजे जैन भवनमा विशेष कन्सर्ट आयोजना हुनेछ, जसमा युवामाझ लोकप्रिय गायक नितेशजंग कुँवरको प्रस्तुति रहनेछ ।
एनपीएल ट्रफी टुरका क्रममा कोशी प्रदेशका विभिन्न सहरमा समेत ट्रफी प्रदर्शन र साँगीतिक कार्यक्रम आयोजना गरिने आयोजकले जनाएको छ ।

























