
विराटनगर । विराटनगरबाट मंगलबार १० लाख रूपैयाँ बढीको तस्करीका सामान बरामद भएको छ । बेवारिसे अवस्थामा लत्ताकपडा र किराना सामान फेला पारेर बरामद गरिएको प्रहरीले जनाएको छ ।
मोरङ प्रहरी प्रवक्ता डीएसपी कोपिला चुँडालका अनुसार विराटनगर महानगरपालिका–७ बाट १० लाख ११ हजार ९ सय ४० रूपैयाँ बराबरको सामान बरामद गरिएको हो । ९ लाख ५७ हजार ६ सय रूपैयाँ बराबरका कपडा र ५४ हजार ३ सय ४० रूपैयाँ बराबरका किराना सामान रहेको उनले बताइन् ।
कपडा र सामान कसको हो भनेर यकिन हुन सकेको छैन । भारतबाट तस्करी गरेर ल्याउँदै गर्दा प्रहरीलाई देखेपछि सामान छाडेर तस्करीमा संलग्नहरु फरार भएको हुनसक्ने प्रहरीको अनुमान छ ।
बरामद गरिएको कपडा र किराना सामान आवश्यक कारबाहीका लागि प्रहरीले विराटनगर भन्सार कार्यालयमा बुझाएको छ । चाडपर्वका बेलामा तस्करी बढ्न सक्ने सम्भावना रहेको बताउँदै मोरङ प्रहरी प्रमुख एसपी कवित कटवालले नेपाल–भारत सीमा क्षेत्रमा कडाइ गरिएको जानकारी दिए ।
सशस्त्र प्रहरी, भन्सारलगायतका निकायसँग समन्वय गरेर सीमा क्षेत्रमा उच्च सतर्कता अपनाइएको उनको भनाइ छ । तिहार नजिकिएसँगै सीमा क्षेत्रमा तस्करी बढ्न सक्ने देखेर सुरक्षा सतर्कता बढाइएको कटवालले बताए ।

























