
विराटनगर । ताप्लेजुङमा ‘कञ्चनजंघा सेसेलुङ महिला गोल्डकप फुटबल’ प्रतियोगिता मंसिर दोस्रोदेखि हुने भएको छ ।
फुङ्लिङमा शुक्रबार चासोक तङ्नाम सञ्चालन समितिले पत्रकार सम्मेलनको आयोजना गर्दै मंसिर दोस्रो सातादेखि महिला गोल्डकप हुन लागेको जानकारी दिएको हो ।
पत्रकार सम्मेलनमा समितिका अध्यक्ष चन्द्रकुमार थेबेले मंसिर १३ देखि २० गतेसम्म महिला गोल्डकप फुटबल आयोजना गर्न लागेको जानकारी दिए ।
उनका अनुसार लिम्बू समुदायको मौलिक चाड चासोक तङ्नाम (न्वागी पर्व) को अवसरमा प्रतियोगिता गर्न लागिएको हो ।
यसअघि पुरुष फुटबल प्रतियोगिता हुँदै आएकोमा यस वर्ष ताप्लेजुङको अन्तरपालिका स्तरीय महिला फुटबल आयोजना गर्न लागिएको हो । प्रतियोगितामा सहभागी टोलीले ४ जनासम्म राष्ट्रिय खेलाडीलाई समावेश गर्न सक्ने छन् ।
प्रतियोगिताको विजेताले नगद २ लाख २ हजार ८२ रुपैयाँ र उपविजेताले १ लाख २ हजार ८२ रुपैयाँका साथै ट्रफी प्राप्त गर्ने छन् ।
खलेको प्लेयर अफ द म्याचले ५ हजार रुपैयाँका साथै व्यक्तिगत विधातर्फका खेलाडीले जनही ८ हजार रुपैयाँ र सर्वोत्कृष्ट खेलाडीले १० हजार रुपैयाँ पुरस्कार प्राप्त गर्ने आयोजकले जनाएको छ ।

























