विश्व रेडियोलोजी दिवसः विराटनगरमा ११ जना सम्मानित

विराटनगर । विश्व रेडियोलोजी दिवसको अवसरमा आज (शनिबार) बिहान विराटनगरमा नेपाल रेडियोलोजिकल सोसाइटी कोशी प्रदेशको आयोजनामा प्रभातफेरी तथा सम्मान कार्यक्रम सम्पन्न भएको छ । नोभेम्बर ८ लाई एक्स–रे प्रविधिको प्रतिपादन वा सुरुवात भएको दिन मानेर विश्वभर रेडियोग्राफी पेशा अङ्गालेकाहरूले यो दिवस मनाउने गर्छन् । सन् २०१२ देखि नोभेम्बर १० लाई अन्तर्राष्ट्रिय रूपमा विश्व रेडियोलोजी दिवस मनाउन थालिएको छ ।

यसै अवसरमा निकालिएको प्रभातफेरीले नगरका विभिन्न भाग परिक्रमा गर्दै शनिहाट चोकस्थित एलिट भवनमा पुगेर सम्मान कार्यक्रममा परिणत भएको थियो ।

Advertisement

नेपाल रेडियोलोजिकल सोसाइटी कोशी प्रदेशका अध्यक्ष गणेश बजागाईंले कोशी प्रदेशभरका सबै रेडियोग्राफरहरूलाई एकै ठाउँ भेला गरी पहिलो पटक दिवस मनाइएको जानकारी दिए । उनले यो सम्भवतः नेपालमा नै यसरी सामूहिक रूपमा दिवस मनाइएको पहिलो प्रयास रहेको बताए ।

लामो समयदेखि कोशी प्रदेशमा रेडियोग्राफी क्षेत्रमा महत्वपूर्ण सेवा पुऱ्याउँदै आएका ११ जना अग्रज हरूलाई सोही अवसरमा सम्मान गरिएको अध्यक्ष बजागाईंले बताए ।

सम्मानित हुनेहरूमा कोशी अस्पतालबाट विष्णुप्रसाद शर्मा, विनोद काफ्ले, मोहनकुमार थापा र शर्भा मण्डल (खत्वे) रहेका छन् । यसैगरी, नोबेल अस्पतालका सन्तोषकुमार माझी, परमेश्वर सरदार र सन्तोष माझी, न्युरो अस्पतालका मदन कामत, सुरेश राजवंशी र पुष्प राजवंशी तथा विराट अस्पतालका विनय झा लाई सम्मान गरिएको थियो ।

सम्मानित व्यक्तिहरूलाई कोशी प्रदेश स्वास्थ्य मन्त्रालयका सचिव डा. यदुचन्द्र घिमिरे लगायतले सम्मानपत्र प्रदान गरेका थिए ।