
काठमाडौं । नेपाल सरकारले तिर्न बाँकी रहेको सार्वजनिक ऋण गत कात्तिक महिनासम्ममा २७ खर्ब २९ अर्ब ४१ करोड रुपैयाँ पुगेको छ। यो कुल गार्हस्थ्य उत्पादन (जीडीपी) सँगको अनुपातमा ४४.६९ प्रतिशत हुन आउँछ।
सार्वजनिक ऋण व्यवस्थापन कार्यालयका अनुसार गत असार मसान्तको तुलनामा कात्तिक मसान्तसम्म आइपुग्दा तिर्न बाँकी सार्वजनिक ऋण ५५ अर्ब ३६ करोड रुपैयाँले थपिएको हो।
कुल ऋणमध्ये आन्तरिक र बाह्य ऋणको हिस्सा आन्तरिक ऋण: १२ खर्ब ७५ अर्ब ९६ करोड रुपैयाँ (जीडीपीको २०.८९ प्रतिशत)। बाह्य ऋण: १४ खर्ब ५३ अर्ब ४५ करोड रुपैयाँ (जीडीपीको २३.८० प्रतिशत) छ। यसरी हेर्दा, कुल ऋणको ठूलो हिस्सा बाह्य स्रोतबाट रहेको स्पष्ट हुन्छ।
यो अवधिमा सरकारले १ खर्ब ३८ अर्ब ७५ करोड रुपैयाँ नयाँ ऋण प्राप्त गर्यो। यसको तुलनामा, सरकारले १ खर्ब ५० अर्ब ८८ करोड रुपैयाँ ऋण भुक्तानी गरेको छ। यसमा १ खर्ब २७ अर्ब ६१ करोड साँवा र २३ अर्ब २७ करोड रुपैयाँ ब्याज खर्च भएको छ। यस अवधिमा सरकारले वार्षिक लक्ष्यको तुलनामा आन्तरिक ऋण राम्रो (१ खर्ब २० अर्ब) उठाए पनि बाह्य ऋण भने निकै कम (१८ अर्ब ७५ करोड) मात्र संकलन गरेको प्रतिवेदनमा उल्लेख छ।

























