
काठमाडौं। हालैको जेन-जी आन्दोलनका क्रममा भएका भौतिक तथा अन्य क्षतिका लागि निर्जीवन बीमा कम्पनीहरूमा कूल ३ हजार २५५ वटा बीमा दाबी परेको छ। नेपाल बीमा प्राधिकरणले दिएको जानकारीअनुसार कूल २३ अर्ब ४३ करोड ४१ लाख रुपैयाँ दाबी रकममध्ये हालसम्म अग्रिम भुक्तानीसमेत गरी करिब ४ अर्ब २ करोड दाबी रकम बीमितहरूलाई भुक्तानी भइसकेको छ।
प्राधिकरणमा निर्जीवन बीमा कम्पनीहरूबाट प्राप्त अद्यावधिक तथ्याङ्क अनुसार, सबैभन्दा ठूलो भुक्तानी सम्पत्ति बीमातर्फ भएको छ। सम्पत्ति बीमातर्फ ६९५ वटा दाबीको करिब १९ अर्ब ३ करोड ४१ लाख दाबी रकममध्ये करिब ३ अर्ब ९ करोड ४७ लाख भुक्तानी भएको छ। यसैगरी, मोटर बीमातर्फ २ हजार २९५ वटा दाबी परेका थिए, जसको दाबी रकम करिब ३ अर्ब ४४ करोड १० लाखमध्ये करिब ८४ करोड ८५ लाख अग्रिम भुक्तानीसहित भुक्तानी भएको छ।
इञ्जिनीयरिङ तथा ठेक्का जोखिम बीमातर्फ २०९ वटा दाबीको करिब ५५ करोड ४ लाख दाबी रकममध्ये करिब ६ करोड ६९ लाख, परिवहन बीमातर्फ १२ वटा दाबीको करिब १ करोड ६९ लाख दाबी रकममध्ये करिब ४८ लाख र अन्य बीमातर्फ ४४ वटा दाबीको करिब रू. ३९ करोड १८ लाख दाबी रकममध्ये करिब ३९ लाख अग्रिम भुक्तानीसमेत गरी बीमितहरूले प्राप्त गरेका छन्।
जेन-जी आन्दोलनका क्रममा भएका भौतिक तथा अन्य क्षतिको बीमा दाबी भुक्तानीका लागि नेपाल पुनर्बीमा कम्पनीले निर्जीवन बीमा कम्पनीहरूलाई अग्रिम भुक्तानीसहित करिब २ अर्ब ५१ करोड ७९ लाख दाबी भुक्तानी गरेको छ। नेपाल पुनर्बीमा कम्पनीमा परेको कूल २ हजार ८६० वटा पुनर्बीमा दाबीको दाबी रकम करिब १५ अर्ब ८१ करोड रहेको अद्यावधिक तथ्याङ्क रहेको प्राधिकरणले जनाएको छ।

























