नेपालमा एचआईभी संक्रमण घट्दै: हालसम्म ३४ हजार बढी संक्रमित

काठमाडौँ । नेपालमा एचआईभी संक्रमितको सङ्ख्या विस्तारै घट्न थालेको सरकारी तथ्याङ्कले देखाएको छ । विश्व एड्स दिवसको अवसरमा आइतबार काठमाडौंमा आयोजित एक कार्यक्रममा राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले अनुमानभन्दा संक्रमण दर घटेको जानकारी दिए ।

उनले सन् २०२४ को अन्त्यसम्म नेपालमा कुल ३४ हजार ३ सय ३७ व्यक्तिमा एचआईभी संक्रमण भएको बताए । सरकारी तथ्याङ्क अनुसार कुल संक्रमितमध्ये १५ वर्ष भन्दा माथिका ३३ हजार २ सय ७९ जना रहेका छन्।

लिङ्ग र उमेर समूह अनुसार संक्रमितको सङ्ख्या

पुरुष (१५ वर्ष माथि): १९ हजार २ सय ७९ जना

महिला (१५ वर्ष माथि): १४ हजार जना

बालबालिका (१५ वर्ष मुनि): एक हजार ५८ जना

डा. शर्माले हाल पनि दिनमा औसत २ जना नयाँ संक्रमित थपिने गरेको र दिनमा १ जनाको एचआईभीका कारण मृत्यु भइरहेको जानकारी दिए। निर्देशक डा. शर्माका अनुसार नेपालले सन् २०३० सम्ममा एड्सको महामारीलाई अन्त्य गर्ने लक्ष्य लिएको छ। डा. शर्माले आगामी एक वर्षभित्र एचआईभी संक्रमण विरुद्धको रणनीति बनाउनुपर्ने आवश्यकता रहेको पनि औँल्याएका छन्।

यो लक्ष्य हासिल गर्नका लागि सरकारले निम्न तीन क्षेत्रमा ९५ प्रतिशतको सफलता हासिल गर्ने नीति लिएको छ:

संक्रमणबारे थाहा पाउने: ९५ प्रतिशत

९५ प्रतिशतले औषधि उपचारमा पहुँच पुराउने।

९५ प्रतिशतको भाइरल लोड कम गराउने।