
झापा । झापाको शिवसताक्षी नगरपालिका–४ बुलु चोकमा रहेको झापा इनर्जीले साउनदेखि मंसिरसम्म ६५ लाख युनिटभन्दा बढी विद्युत् उत्पादन गरेको छ ।
सौर्य ऊर्जा उत्पादक कम्पनी झापा इनर्जीले ५ महिनामा ४ करोड ७० लाख ९३ हजार ४ सय ९७ रुपैयाँ मूल्यको विद्युत् नेपाल विद्युत् प्राधिकरणलाई बिक्री गरेको हो ।
कम्पनी सञ्चालक समितिका अध्यक्ष लालबहादुर साँवा लिम्बूले आर्थिक वर्ष २०८२ / ०८३ को साउनदेखि मंसिर मसान्तसम्मको अवधिमा कम्पनीले ६५ लाख २१ हजार २ सय ६० युनिट विद्युत् उत्पादन गरेको जानकारी दिए ।
झापा इनर्जीको १० मेगावाटको सौर्य विद्युत् परियोजनाले उत्पादन गरेको विद्युत् नेपाल विद्युत् प्राधिकरणले प्रतियुनिट ७ रुपैयाँ ३० पैसाका दरले खरिद गर्दछ । इनर्जीले २०८० साल माघ १० गतेदेखि विद्युत् को व्यावसायिक उत्पादन गर्दै आएको छ । त्यसअघि २०७८ मंसिर १२ गते प्राधिकरणले इनर्जीसँग विद्युत् खरिद बिक्रीको सम्झौता गरेको थियो ।
परियोजनास्थलमा २१ हजार ६ सय वटा सौर्य प्यानल जडान गरिएको छ । परियोजनाबाट उत्पादित सौर्य विद्युत् लाई १ किलोमिटरको दूरीभित्र रहेको नेपाल विद्युत् प्राधिकरणको बुलु चोक सबस्टेशनमा पुर्याएर राष्ट्रिय प्रसारण लाइनमा जोडिएको छ ।
झापा इनर्जीले आव २०८० / ०८१ मा ५ करोड २८ लाख ८४ हजार ७ सय ७७ मूल्य बराबरको सौर्य विद्युत् उत्पादन गरी प्राधिकरणलाई बिक्री गरेको थियो । आव २०८१ / ०८२ मा बिक्री बढेर ९ करोड १० लाख ५९ हजार ४ सय ७५ पुगेको कम्पनीले जनाएको छ ।

























