
ललितपुर । ललितपुर ब्याडमिन्टन संघ र बालकुमारी रिमिक्स क्लबको संयुक्त आयोजनामा चौथो ललितपुर मेयर कप राष्ट्रिय ब्याडमिन्टन प्रतियोगिता मंगलबार (भोलि) बाट हुने भएको छ ।
ललितपुरस्थित बालकुमारी रिमिक्स क्लबको कभर्ड हलमा ५ दिनसम्म प्रतियोगिता हुने आयोजकले जनाएको छ ।
ललितपुर महानगरपालिकाको मुख्य प्रायोजन रहने प्रतियोगितामा पुरुष एकल र महिला एकल खुला, उच्च २० वरियता बाहेकको पुरुष युगल, यु १७ पुरुष तथा महिला एकल खुला, ४५ वर्षमाथिका मास्टर युगल खुला गरी ६ विधामा करिब २ सय २६ खेलाडीले प्रतिस्पर्धा गर्ने म्याच कन्ट्रोल सुमित शाक्यले जानकारी दिए ।
अघिल्ला ३ संस्करण सफलतापूर्वक सम्पन्न गरिसकेको प्रतियोगिताको अनुमानित लागत ३२ लाख २० हजार ५ सय रहेको छ भने प्रतियोगिताको पुरस्कार राशि ४ लाख २५ हजार रहेको छ । यस संस्करणमा पुरुष एकल, महिला एकल र पुरुष युगलतर्फको पुरस्कार राशिमा वृद्धि गरिएको सचिव दीप महर्जनले जानकारी दिए ।
अघिल्लो संस्करणमा पुरुष एकल, महिला एकल र पुरुष युगलतर्फ शीर्ष ३ स्थान हासिल गर्नेले नगद ४० हजार, २० हजार र १० हजार प्राप्त गर्दै भने यस पटक पुरस्कार राशिमा वृद्धि गरेर ५० हजार, २५ हजार र १० हजार गरिएको महर्जनले बताए ।
यस्तै, यु १७ पुरुष तथा महिलाका शीर्ष ३ स्थान हात पार्नेले नगद २० हजार, १० हजार र ५ हजार तथा मास्टर युगलतर्फको विजेताले नगद ३० हजार, १५ हजार र ७ हजार ५ सय सहित मेडल, प्रमाणपत्र र ट्रफी प्राप्त गर्नेछन् ।

























