
विराटनगर । श्रीकृष्ण जन्माष्टमीको भोलिपल्ट विराटनगरमा निकालिने रथयात्राका लागि प्रदेश सरकारले सार्वजनिक बिदा दिएको छ । मंगलबार प्रदेश सरकारले कोशी प्रदेशका १४ वटै जिल्लामा बिदा दिएको हो ।
विक्रम संवत १९८८ सालदेखि ‘खट’ यात्राबाट प्रारम्भ भएको रथयात्रा २०२५ सालबाट रथयात्रा महोत्सवको रूपमा मनाउन थालिएको थियो ।
विराटनगरको रथयात्रालाई दक्षिण एसियाको दोस्रो ठूलो रथयात्रा भएकाे दाबी गरिन्छ । विराटनगर महानगरपालिका– १ स्थीति राधाकृष्ण मन्दिरबाट राधाकृष्णको युगल जोडीसहितको रथ विराटनगर निकालिन्छ । मंगलबार दिउँसो साढे ३ बजे मन्दिरदेखि सुरु हुने रथयात्राले बजार क्षेत्रकाे ९ किलोमिटर यात्रा तय गर्ने छ । राधाकृष्ण मन्दिर परिसरबाट निकालिने रथयात्रा तीनपैन, मेनरोड, ट्राफिक चोक, रोडशेष चोक, महेन्द्रचोक, धरान रोड, बरगाछी हुँदै पुनः मन्दिर परिसरमा पुगेर समापन हुनेछ ।
संघीय सरकारले दिएका सार्वजनिक बिदाहरूबाहेक वर्षभरिमा प्रदेशलाई थप ६ वटा बिदा दिने सुविधा छ । महानगरमा निकालिने रथयात्राका लागि प्रदेश सरकारले प्रदेश भरि बिदा दिएकाे हाे ।
२०८० चैत ९ गते राजपत्र प्रकाशित गर्दै प्रदेश सरकारले भदौं ११ गते राधाकृष्ण रथयात्रा, छठ पर्वमा कात्तिक २३ गते र कात्तिक २५ गते फाल्गुनन्द जयन्तीमा प्रदेशभर विदा दिने निर्णय गरेको थियो । त्यस्तै सिरुवा पर्वमा बैशाख २ गते, झापा मोरङ सुनसरी र उदयपुर र भदौं २३ गते ऋषि पञ्चमीमा प्रदेशभरि महिला कर्मचारीलाई मात्रै विदा दिने निर्णय गरेको थियो ।


























