
काठमाडौं । मनसुनी वायुको प्रभावका कारण आज (बिहीबार) मुलुकका विभिन्न प्रदेशमा भारी र अति भारी वर्षा हुने अनुमान गरिएको छ ।
कोशी, बागमती, लुम्बिनी र सुदूरपश्चिम प्रदेशका १–२ स्थानमा हावाहुरीसहित भारी वर्षाको सम्भावना रहेको मौसम पूर्वानुमान महाशाखाले जनाएको छ । महाशाखाका अनुसार कोशी, बागमती, लुम्बिनी र सुदूरपश्चिम प्रदेशका केही स्थानमा स्थानमा हल्कादेखि मध्यम वर्षा भइरहेको छ।
मनसुनको न्यून चापीय रेखा सरदर स्थानभन्दा दक्षिणतिर अवस्थित रहेकाले पहाडी भू–भागलगायत कर्णाली तथा सुदूरपश्चिम प्रदेशमा साधरणतया बदली रही बाँकी क्षेत्रमा आंशिक बदली रहने जनाइएको छ । दिउँसो सुदूरपश्चिम प्रदेशमा साधरणदेखि पूर्णतः बदली र बाँकी प्रदेशहरूमा आंशिकदेखि साधरणतया बदली रहने अनुमान छ ।
महाशाखाका अनुसार सुदूरपश्चिम प्रदेशका धेरै तथा बाँकी प्रदेशका केही स्थानहरूमा चट्याङसहित हल्कादेखि मध्यम वर्षाको सम्भावना छ । राति सुदूरपश्चिम प्रदेशका धेरै तथा बाँकी प्रदेशका केही स्थानहरूमा चट्याङसहित हल्कादेखि मध्यम वर्षा हुने अनुमान छ ।
गण्डकी, लुम्बिनी र सुदूरपश्चिम प्रदेशका १–२ स्थानमा हावाहुरीसहित भारी वर्षाको सम्भावना छ। लुम्बिनी र सुदूरपश्चिम प्रदेशका १–२ स्थानमा धेरै भारीदेखी अति भारी वर्षा हुने अनुमान गरिएको छ ।
कोशी, बागमती, गण्डकी, लुम्बिनी र सुदूरपश्चिम प्रदेशका १–२ स्थानमा हावाहुरीसहित भारी वर्षाको सम्भावना छ । वर्षाका कारण आउने बाढी, पहिरोलगायतका प्रकोपबाट जोगिनलाई आवश्यक सतर्कता अपनाउन महाशाखाले सबैमा आग्रह गरेको छ ।

























