
विराटनगर । कोशी प्रदेशमा सबैभन्दा धेरै वर्षा भएको जनाइएको छ । पछिल्लो २४ घण्टामा कोशी प्रदेशमा सबैभन्दा बढी वर्षा मापन भएको हो ।
निरन्तरको वर्षाले मुलुकभर १६ स्थानमा चेतावनीको तह पार गरेको छ । वर्षा मापन केन्द्र रहेका स्थानमा मापन गरिएको वर्षाको अवस्थाले १६ ठाउँमा चेतावनीको तह पार गरेको देखाएको हो ।
चेतावनीको तह पार भएका वर्षा मापन केन्द्रहरुमध्ये अधिकांश कोशी प्रदेशमा छन् । जल तथा मौसम विज्ञान विभागका अनुसार कोशी प्रदेशको मोरङ, झापा, उदयपुर र इलाम जिल्लामा अत्यधिक वर्षाको मापन भएको छ ।
त्यसपछि मधेस प्रदेशको सप्तरी र लुम्बिनीको पाल्पामा पनि अत्यधिक वर्षा मापन गरिएको छ । कोशी प्रदेशको मोरङको हरैँचा, बाहुनी, विराटनगर विमानस्थल, झापाको अनारमनी, शनिश्चरे, केचना, गौरादह, चन्द्रगढी विमानस्थल, सिस्ने अर्जुनधारा र बाहुनडाँगी, इलामको कन्काई, मैनाचुली र उदयपुरको सुन्दरपुरमा चेतावनीको तह पार गर्ने गरी वर्षा भएको हो ।
मधेस प्रदेशमा सप्तरीको बरमझिया, रुपानी बजार तथा लुम्बिनी प्रदेशको पाल्पाको जाल्पा र अर्चलेमा वर्षाले चेतावनीको तह पार गरेको हो । विभागका अनुसार अहिले देशभरका अधिकांश स्थानमा हल्कादेखि मध्यम वर्षा भइरहेको छ ।
पछिल्लो २४ घण्टाको अवधिमा झापाको चन्द्रगढी विमानस्थलमा २३२.२ मिलिमिटर वर्षा भएको छ । त्यस्तै केचनामा २१२, अनारमनी बिर्तामा २०२, गौरादहमा १९७, बाहुनडाँगीमा १६७ र सिस्नेमा १४३ मिलिमिटर वर्षा भएको छ । इलामको माईचुलीमा २३१ मिलिमिटर वर्षा भएको छ ।
जोखिम बढेपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार र शनिबार गरेर दुई दिन हिमाली तथा पहाडी जिल्लामा रात्रि बस नचलाउन निर्देशन दिइसकेको छ ।

























