
विराटनगर । कोशी ब्यारेजमा नदीको बहाव ५ लाख ८ हजार क्यूसेक मापन भएको छ । शनिबार १२ बजे ५ लाख ८ हजार क्युसेक मापन भएको हो ।
काेशीकाे बहाव पछिल्लाे दुई वर्षयता कै उच्च हाे । बाढीले उच्च खतराको तह पार गरेपछि पुलमा पैदल यात्रीलाई हिड्न रोक लगाइएको छ । सवारी आवागमन भने खुला छ ।
ब्यारेजको नियन्त्रण भारतीय पक्षले गर्छ, बहाव उच्च भएपछि भारतीय पक्षले सबै ढोका खुला गरेको छ । काेशी ब्यारेजमा ५६ ढाेका छन् ।
भारतीय पक्षले कोशीमा बाढीको मापन ६ लाख ८१ हजार ६३९ क्युसेक पुग्ने खतरा रहेकाले सतर्कता अपनाउन आग्रह गरेको छ ।
बाढी निरन्तर बढ्दो क्रममा रहेकाले सतर्कता अपनाइएको सुनसरी प्रहरी प्रमुख प्रहरी उपरीक्षक विपिन रेग्मीले बताए ।
उनका अनुसार बाढीमा दाउरा निकाल्न र माछा मार्न रोक लगाइएको छ । भारतीय पक्षले पानीको बहाव उच्च हुने आकलन गरेपछि सतर्कता अपनाइएको उनले बताए ।
कोशीमा बहाव उच्च भएपछि भारतको पटनास्थीत जल संसाधन विभागका प्रधान सचिव सन्तोषले सूचना जारी गर्दै कोशीमा बाढीको मापद मापद ६ लाख ८१ हजार ६३९ क्युसेक पुग्नसक्ने भएकाले उच्च सतर्कता अपनाउन आग्रह गरेका छन् ।
बहाव उच्च हुँदा डुबानको जोखिम हुने भएकाले कोशी नदीसँग जोडिएका भारतको सुपौल, सहरसा, मधेपुरा, मधुवनी दरभंगा र खगडिया जिल्ला सुरक्षा सम्यन्त्रलाई पनि सतर्क रहन आग्रह गरेका थिए ।


























