खनारको अवस्था सामान्य बन्यो, २ जना एसपीसहित २१ प्रहरी घाइते

Share this
687shares
मुलुकी खबर
मुलुकी खबर
clock२०८१ मंसिर २, आइतबार २३:४९

विराटनगर । दुर्घटनामा बालिकाको मृत्यु भएपछि अशान्त बनेको सुनसरीको खनारको अवस्था सामान्य भइसकेको प्रहरीले जनाएको छ ।

प्रहरीका अनुसार विराटनगरतर्फ आउँदै गरेको नागरिक यातायातको मे १ ख ४५७४ नम्बरको बसले इटहरी उपमहानगरपालिका–१० रिलाइन्स अगाडि अपरान्ह ४ः३० बजेतिर दुर्घटना गराएको थियो । दुर्घटनामा सुनसरीको इटहरी उपमहानगरपालिका–१० की १३ वर्षीया सजना यादवको मृत्यु भयो ।

प्रहरीका अनुसार उनी इटहरीको जनता माध्यमिक विद्यालयको कक्षा ९ मा अध्ययरत थिइन् । घटनास्थलमै मृत्यु भएकी बालिकाको शवलाई पोस्टमार्टमका लागि विराटनगरको कोशी अस्पताल पठाइएको छ । प्रहरीका अनुसार दुर्घटनामा परेका बेला बालिका साइकलमा थिइन् ।

प्रहरीका अनुसार दुर्घटना गराएर भागेको बसलाई खनार चोकस्थित सुनसरी–मोरङ सिँचाई आयोजनाको पुलनजिकै आक्रोसित भिडले आगो लगाएको थियो । आगजनीबाट बस पूर्णरूपले जलेर ध्वस्त भएको छ ।

दुर्घटनापछि आक्रोसित बनेको भिडले बसमा आगो लगाउन थालेपछि त्यहाँभित्र रहेका यात्रुहरु निस्किएर भागेको प्रहरीले जनाएको छ । चालक विराटनगर महानगरपालिका–१३ का २७ वर्षीय अमित श्रेष्ठ इलाका प्रहरी कार्यालय इटहरीको नियन्त्रणमा छन् ।

दुर्घटनापछि खनार बजार करिब ६ घण्टा तनावग्रस्त बन्यो । प्रहरीका अनुसार करिब ७ सयको भिडले ढुंगामुडा र आगजनी गर्यो । ढुंगाले लागेर आगो निभाउन पुगेको रामधुनी नगरपालिकाको दमकलको सिसा फुटेको छ ।

अन्य सवारीसाधनमा पनि तोडफोड गरिएको सुनसरी प्रहरीका प्रवक्ता डीएसपी रामप्रसाद तिमल्सिनाले बताए । उनका अनुसार क्षतिको पूर्ण विवरण आइसकेको छैन ।

स्थितिलाई नियन्त्रणमा लिन लाट्ठी चार्ज, अश्रुग्यास प्रहार र हवाई फायर गर्नु परेको सुनसरीका प्रमुख जिल्ला अधिकारी रामचन्द्र तिवारीले बताए । प्रहरीले २० राउण्ड हवाई फायर र ३० सेल अश्रुग्यास प्रहार गरेको छ । ‘माहोल थप भड्किन नदिन सामान्य बल प्रयोग गर्नुपर्ने अवस्था आयो,’ तिवारीले भने ।

उनीसहित सुनसरी प्रहरी प्रमुख एसपी सुमनकुमार तिम्सिना, जिल्ला प्रहरी प्रवक्ता डीएसपी रामप्रसाद, इलाका प्रहरी कार्यालय इटहरीका डीएसपी लक्ष्मी भण्डारीलगायत घटनास्थलमा पुगेका थिए । घटनास्थल वरपर ठूलो संख्यामा सुरक्षाकर्मी परिचालन गरिएको थियो ।

राति साढे १० बजेबाट अवस्था सामान्य भइसकेको र राजमार्गमा सवारीसाधन सञ्चालन हुन थालेको घटनास्थलमा रहेका इलाका प्रहरी कार्यालय इटहरीका डीएसपी भण्डारीले जानकारी दिए ।

घटनाको छानबिन गर्नका इन्स्पेक्टर महेन्द्र पराजुलीको नेतृत्वमा ५ सदस्यीय समिति गठन गरिएको छ । जिल्ला सुरक्षा समितिको आकस्मिक बैठकले समिति गठनको निर्णय गरेको सुनसरी प्रहरी प्रमुख एसपी तिम्सिनाले बताए ।

छानबिन समितिको प्रतिवेदनका आधारमा थप कारबाही अघि बढ्ने र घटनाको अनुसन्धान सुरु गरिएको जानकारी उनले दिए । घटनास्थल वरपरको सीसी क्यामेरा फुटेजको पनि प्रहरीले अध्ययन गरिरहेको छ । घटनामा संलग्नलाई कारबाहीको दायरामा ल्याइने तिम्सिनाको भनाइ छ ।

२ एसपीसहित २१ प्रहरी घाइते
भिडले ढुंगामुडा गर्दा एसपी तिम्सिना, सशस्त्रका एसपी समेनन्द बज्राचार्य, डीएसपीहरु तिमल्सिना र भण्डारीसहित २१ प्रहरी घाइते भएका छन् । अन्य घाइतेहरुमा इन्स्पेक्टर सागर तिमल्सिना, असइहरु आनन्द पोखरेल, भूपराज पोखरेल, वरिष्ठ हवल्दार समीर सापकोटा, अयोधी यादव, हवल्दार गोमा राउत, श्यामनारायण यादव, कल्याणी आचार्य घाइते भएका छन् ।

त्यसैगरी, सहायक हवल्दार राकेश न्यौपाने, दीपक राई, लोकनाथ धमला, अशोक राई, जवान गणेश तिमल्सिना, सुमन खड्का, सन्दीपकुमार मोक्तान र प्रकाश दाहाल घाइते भएका छन् । घाइते सबैको अवस्था सामान्य रहेको प्रहरीले जनाएको छ ।

दुर्घटनापछि सुनसरीको खनार तनावग्रस्त : बसमा आगजनी, हवाई फायर र अश्रुग्यास प्रहार (भिडियाे)

तपाइको प्रतिक्रिया
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.