
विराटनगर । प्रहरीले मोरङ र सुनसरीबाट ६ जनालाई पक्राउ गरेको छ । बिहीबार पक्राउ परेकाको साथबाट लागुऔषध बरामद भएको छ ।
सुनसरीको इनरुवा नगरपालिका–४ बसपार्कबाट को १ ह ८९८८ नम्बरको अटोमा सवार धरान उपमहानगरपालिका–६ का १ बालकको साथबाट ३ ग्राम ८६ मिलिग्राम ब्राउन सुगर (खैरो हेरोइन) फेला परेको थियो । त्यसलगत्तै प्रहरीले २४ वर्षीय युवराज लिम्बू र अटो चालक धरान–८ का २८ वर्षीय निलन लिम्बूलाई नियन्त्रणमा लिएको छ ।
त्यस्तै, धरान–१४ का ५२ वर्षीय कुमार बस्नेत पक्राउ परेका छन् । उनको कोठाबाट स्पास्मोप्रोक्सिभन ५ सय ७५ ट्याब्लेट बरामद भएको प्रहरीले जनाएको छ ।
मोरङको इलाका प्रहरी कार्यालय उर्लाबारीले रतुवामाई नगरपालिका–६ का २९ वर्षीय मनोज कार्कीलाई पक्राउ गरेको छ । कार्कीको साथबाट ३ सय ८० मिलिग्राम ब्राउन सुगर बरामद भएको प्रहरीले जनाएको छ ।
यसैबीच, वडा प्रहरी कार्यालय विराटनगरले ३७ मिलिग्राम ब्राउन सुगरसहित विराटनगर महानगरपालिका–९ का ३३ वर्षीय विकासकुमार साहलाई नियन्त्रणमा लिएको छ । लागुऔषधसहित पक्राउ परेकामाथि प्रहरीले थप अनुसन्धान गरिरहेको छ ।

























