
विराटनगर । पतिको कुटाइबाट मोरङको कानेपोखरीकी १ जना महिलाको मृत्यु भएको छ । कानेपोखरी गाउँपालिका–१ झरनाकुटुकी ४० वर्षीया दुर्बी सतारको मृत्यु भएको हो
मोरङ प्रहरीका डीएसपी हस्तबहादुर सुनारका अनुसार घरायसी विवादका क्रममा पति ४५ वर्षीय बाबुधन सतारले पत्नी दुर्बीमाथि कुटपिट गरेको प्रारम्भिक अनुसन्धानबाट खुलेको छ । दुर्बीमाथि आइतबार राति ८ बजेतिर पतिले कुटपिट गरेको प्रहरीको भनाइ छ ।
कुटपिटबाट कानमा चोट लागेर घाइते भएकी उनलाई उपचारका लागि विराटनगरको कोशी अस्पताल ल्याइएको थियो । ‘अवस्था गम्भीर बन्दै गएका बेला सोमबार आफन्तले आफूखुसी घरतिर लिएर गएका थिए,’ डीएसपी सुनारले भने, ‘घर लैजाँदै गर्दा बाटैमा साँझ उनको मृत्यु भएको पाइएको छ ।’
पति–पत्नीबीचको झगडा छुट्याउन गएका छिमेकी ५० वर्षीय छोटेलाल हस्दासमेत घटनामा परेर घाइते भएका थिए । टाउकोमा चोट लागेका उनको अवस्था सामान्य छ । छोटेलालको पनि कोशीमै उपचार भइरहेको प्रहरीले जनाएको छ ।
श्रीमतीको हत्यामा संलग्न बाबुधनलाई नियन्त्रणमा लिएर इलाका प्रहरी कार्यालय पथरीले घटनाको अनुसन्धान अघि बढाएको छ । उनीविरुद्ध कर्तव्य ज्यान मुद्दा चलाउने प्रहरीको तयारी छ । इलाका प्रहरी कार्यालय पथरीका डीएसपी तुलसीराम अर्याल नेतृत्वको टोलीले घटना अनुसन्धानको बाँकी प्रक्रिया अघि बढाएको छ ।

























