विराटनगरको बाल सुधारगृहको अवस्था सामान्य, के के भयो क्षति ?

विराटनगर । एक्कासि झडप भएर अवस्था तनावपूर्ण बनेको विराटनगरको बाल सुधारगृह सुरक्षा नियन्त्रणमा आएको छ ।

सुरक्षाकर्मीले आफ्नो नियन्त्रणमा लिएर सुधारगृहको अवस्था सामान्य बनाएका हुन् । विराटनगर महानगरपालिका–३ मा रहेको सुधारगृहमा बुधबार दिउँसो १२ः४५ बजेतिर झडप भएको थियो । सुधारगृहमा रहेका बाल बिज्याइँकर्ताबीच दोहोरो झडप हुँदा अवस्था तनावग्रस्त बन्न पुग्यो ।

उनीहरुबीच के कारणले झडप भएको हो भनेर यकिन छैन । प्रहरीले अनुसन्धान गरिरहेको छ । कानुनको विवादमा परेका बाल बिज्याइँकर्ता बालकहरुबीच भएको झडप छुट्याउने क्रममा नेपाल प्रहरीका असई (प्रहरी सहायक निरीक्षक) र वरिष्ठ हवल्दार घाइते भएका छन् ।

सम्झाइबुझाइ गर्ने क्रममा झडपमा उत्रिएका बाल बिज्याइँकर्ताहरुले प्रहरीलाई नै आक्रमण गरेका थिए । आक्रमणबाट सुधारगृहको सुरक्षार्थ खटिएका असई शम्भु चौधरी र वरिष्ठ हवल्दार हिरणकुमार मण्डल घाइते भएको मोरङ प्रहरी प्रमुख एसपी नारायणप्रसाद चिमरियाले बताए ।

असई चौधरीलाई सामान्य चोट लागेको छ । टाउकोमा चोट लागेका वरिष्ठ हवल्दार मण्डलको कोशी अस्पतालमा उपचार भइरहेको छ । तर, अवस्था सामान्य छ ।

सुधारगृहमा दोहोरो झडप भएको जानकारी पाउनसाथ जिल्ला प्रहरी कार्यालय मोरङबाट डीएसपी हस्तबहादुर सुनार नेतृत्वको टोली घटनास्थल पुगेको थियो । वडा प्रहरी कार्यालय विराटनगरलगायतका विभिन्न प्रहरी युनिटबाट पनि प्रहरी परिचालन गरिएको थियो ।

सुधारगृहमा परिचालित प्रहरीले सुधारगृहलाई आफ्नो नियन्त्रणमा लिएर अवस्था सामान्य बनाएको एसपी चिमरियाले बताए । उनका अनुसार झडप सुरु हुनसाथ १२०–१३० जनाजति बाल बिज्याइँकर्ताहरु मुख्य गेट तोडेर बाहिर निस्किएका थिए ।

बाहिर निस्किएर भाग्न खोजेकाहरुलाई सुधारगृहमा खटिएको प्रहरी टोलीले घेरा हालेर सुधारगृहभित्रै पुर्याएको थियो । बेलैमा अपनाएको सुरक्षा सावधानीका कारण बाल बिज्याइँकर्ताहरु भाग्न भने नपाएको र सुधारगृहको अवस्था सामान्य भइसकेको मोरङ प्रमुख जिल्ला अधिकारी इन्द्रदेव यादवले बताए ।

‘झडपका कारण केहीबेर तनावपूर्ण स्थिति उत्पन्न भएको थियो । तर, अहिले अवस्था शान्त भइसकेको छ । थप अवाञ्छित गतिविधि हुने सम्भावना छैन । सुधारगृह अहिले सुरक्षा नियन्त्रणमा आइसकेको छ,’ प्रजिअ यादवले भने । घटनाको जानकारी पाउनसाथ प्रजिअ यादव, एसपी चिमरियालगायतका सुरक्षा अधिकारीहरु सुधारगृहमा पुगेर त्यहाँको अवस्था सामान्य बनाउन भूमिका खेलेका थिए ।

सुधारगृहको क्षमता ५० जनाको हो । हाल २ सय ४९ जना बाल बिज्याइँकर्तालाई राखिएको छ । गणना गर्दा सबै जना सुधारगृहभित्रै रहेको र कसैले पनि भाग्ने मौका नपाएको प्रजिअ यादवले बताए ।

झडपमा उत्रिएका बाल बिज्याइँकर्ताले तोडफोड गरेर सुधारगृहभित्र क्षति पुर्याएका छन् । तोडफोडबाट सुधारगृहको मेष भवन, सुरक्षा ब्यारेक, कार्यालयको कोठा, झ्यालको सिसा, कुर्सीहरु लगायतमा क्षति पुगेको छ । कति मूल्य बराबरको क्षति पुग्यो भनेर यकिन भइसकेको छैन । क्षतिको विवरण संकलनको काम भइरहेको छ ।

विभिन्न अपराधमा संलग्न भएका १८ वर्षमुनिका बालबालिकालाई अदालतको आदेश र फैसला अनुसार सुधारगृहमा राख्ने गरिएको छ । अदालतले पुर्पक्षका लागि थुनामा पठाएका र कसुरदार ठहर गरेका बालकहरुलाई त्यहाँ राख्ने गरिएको हो ।

तर, सुधारगृहमा १८ वर्षभन्दा माथिका पनि धेरै जना छन् । १८ वर्ष तलको हुँदा दोषी ठहर भएकाहरुलाई त्यो भन्दा बढी उमेर भइसक्दा पनि कानुन र वैकल्पिक व्यवस्थाको अभावमा सुधारगृहमै राख्ने गरिन्छ ।

त्यसरी राखिएका बाल बिज्याइँकर्ताबीच बेला–बेला विवाद र झडप हुने गरेको हो । झडपले सुधारगृहको अवस्था अशान्त बन्ने गरेको छ । सुरक्षामा खटिएका प्रहरी र कर्मचारीलाई झुक्याएर बाल बिज्याइँकर्ताहरु फरार पनि हुने गरेका छन् ।