
काठमाडौं । रौतहटमा सुटकेसभित्र मृत भेटिएकी रुबी साहको हत्या आरोपी लक्ष्मण पासवानको पनि मृत्यु भएको छ ।
साहको शव भेटिएपछि फरार भएका पासवानले बुधबार बिहान आफैमाथि आगो लगाएका थिए । जलेको अवस्थामा भेटिएका पासवानलाई उपचारका लागि कीर्तिपुरस्थित बर्न अस्पतालमा भर्ना गरिएको थियो ।
उनको उपचारको क्रममा बुधबार बेलुका मृत्यु भएको जिल्ला प्रहरी परिसर काठमाडौंका एसपी कुलदीप चन्दले जानकारी दिए ।
पासवानले आत्मदाहअघि भिडियाे बनाएर रुबीकाे हत्या गरेकाे स्वीकार गरेका थिए । हत्या गरेदेखि आफ्नो हात काँपिरहेको बताएका उनले रुबी मरिसकेपछि आफू बाँचेर के गर्नु भन्ने लागेको बताएका थिए ।
उनले रुवीसँगको प्रेमसम्बन्धबारे पनि धेरै कुराहरु खुलाएका छन् । उनले हत्या अघि रुबी ब्युटी पार्लरबाट आफ्नो कोठामा आएको र एकअर्का बिना बाँच्न नसक्ने सम्वाद भएको पनि खुलाएका छन् ।

























