
काठमाडाैं । नख्खु कारागारबाट भागेका कैदी सन्तबहादुर तामाङ काभ्रेको पनौती नगरपालिका–१२, गागलमा श्रीमतीको हत्या गरेर नख्खु कारागार फर्किएको खुलेको छ।
श्रीमती मनिषा घ्यावा तामाङको हत्या गरेर शव खाल्डोमा पुरेर उनी कारागार फर्किएका हुन् ।
जिल्ला प्रहरी कार्यालय काभ्रेपलाञ्चोकका प्रमुख कोमल शाहका अनुसार हत्याको आरोपबाट जोगिन उनी कारागार फर्किएको प्रहरीको आशंका छ।
भदौ २४ गते ‘जेनजी’को प्रदर्शनका क्रममा कारागार तोडफोड र आगजनी गरिँदा तामाङ जेलबाट भागेका थिए ।
असोज २ गते राति श्रीमती पर–पुरुषसँग लागेको शंकाको आधारमा श्रीमान–श्रीमतीबीच झगडा भएको थियो । सन्तबहादुरले कुटपिट गर्दा मृत्यु भएपछि उनी करेसाबारीमा शव गाडेर फर्किएका थिए ।
उनी असोज ३ गते नख्खु कारागारमा फर्किएका थिए । जबरजस्ती करणी मुद्दामा कैद भुक्तान गरिरहेका उनीमाथि अब कर्तव्य ज्यान मुद्दामा पनि अनुसन्धान हुनेछ ।
तामाङका १२ वर्षीय एक छोरा र तीन वर्षीया छोरी छन् ।

























