
सिराहा । अपहरणपछि हत्या गरिएको अवस्थामा १५ वर्षीय बालकको शव फेला परेको छ । ३ दिनदेखि बेपत्ता बालकको शव भेटिएको हो ।
सिराहाको गोलबजार नगरपालिका–१३ डंग्राहा गाउँका अभिषेक सिंहको अपहरणपछि हत्या गरिएको प्रहरीको प्रारम्भिक अनुसन्धानबाट पत्ता लागेको छ । प्रहरीका अनुसार आइतबार राति ८ बजेदेखि बेपत्ता उनको शव मंगलबार बिहान घरनजिकै क्षतविक्षत अवस्थामा फेला परेको हो ।
जनता आधारभूत विद्यालय नजिकको आँपको रुखमुनी शव सडेर दुर्गन्ध आउन थालेपछि स्थानीयले प्रहरीलाई खबर गरेका थिए । प्रारम्भिक अनुसन्धानमा खुट्टाको छाला पिल्सिएको, शरीरभर नीलडाम भएको र हत्या पश्चात् शवमा आगो लगाइएको वा एसिड खन्याइएको हुन सक्ने आशंका गरिएको सिराहा प्रहरी प्रमुख एसपी अनन्तकुमार शर्माले जानकारी दिए ।
‘अपहरणपछि हत्या भएको स्पष्ट देखिएको छ । फरेन्सिक विज्ञ तथा मधेश प्रदेश प्रहरी कार्यालयबाट तालिमप्राप्त कुकुरसहितको टोली ल्याएर सूक्ष्म अनुसन्धान भइरहेको छ,’ उनले भने । अभिषेक आइतबार राति खाना खाएर घर बाहिर निस्किएपछि हराएका थिए । रातभर खोजी गर्दा प्नि फेला परेनन् ।
भोलिपल्ट सोमबार बिहान उनकी आमाको इमो खातामा अपहरणकारीले हिन्दी भाषामा ५ करोड रुपैयाँ फिरौती माग्दै सन्देश पठाएका थिए । परिवारले तत्कालै प्रहरीमा उजुरी दिए पनि अभिषेक फेला परेनन् ।
अभिषेकका बुवा सञ्जय सिंहको करेन्ट लागेर ७ वर्षअघि मृत्यु भएको थियो । उनी परिवारका १ मात्र छोरा थिए । बीचमै पढाइ छाडेका उनले परिवारलाई सहयोग गर्न सीटी रिक्सा र ट्रयाक्टर चलाउने गरेका थिए ।
बालकको निर्मम हत्या भएपछि डंग्राहा गाउँ शोकमग्न र त्रसित बनेको छ । गाउँभर रुवाबासी छाएको छ भने स्थानीयले असुरक्षा बढेको महसुस गरिरहेका छन् ।
यसैबीच, घटनामा संलग्न भएको आरोपमा प्रहरीले ८ जनालाई पक्राउ गरेको छ । बालकको अपहरण र हत्यामा संलग्न भएको आशंकामा उनकै आफन्त र छिमेकी पक्राउ परेका हुन् । थप अनुसन्धान भइरहेको भन्दै प्रहरीले पक्राउ परेकाको नाम सार्वजनिक गरेको छैन ।
बालकको शव गाउँ नजिकै भेटिएका कारण उनका आफन्त वा छिमेकहरू कसैले अपहरण गरी हत्या गरेको हुनसक्ने एसपी शर्माले बताए । उनले घटना अनुसन्धानकै क्रममा रहेकोले नाम भने गोप्य राखिएको जनाए ।


























