
विराटनगर । सुनसरीको बर्जु गाउँपालिकाबाट ३ सय किलो लागुऔषध गाँजा प्रहरीले बरामद गरेको छ ।
बर्जु गाउँपालिका–३ स्थित खरी टोलबाट बुधबार राति गाँजासहित एउटा गाडी नियन्त्रणमा लिइएको सुनसरी प्रहरीले जनाएको छ ।
प्रहरी चौकी अमडुवाको गस्ती टोलीले शंकास्पद रूपमा रहेको गाडीलाई नियन्त्रणमा लिएर खानतलासी गर्दा १० वटा बोरामा प्याक गरेर राखिएको अवस्थामा करिब ३ सय किलो गाँजा फेला पारेको प्रहरीले जनाएको छ ।
गस्तीमा रहेको प्रहरी टोलीलाई देखेपछि गाँजा तस्करले गाडी छाडेर फरार भएको हुनसक्ने प्रहरीले अनुमान गरेको छ ।
नम्बर नभएको गाडीमा गाँजा ल्याउँदै गर्दा प्रहरीलाई देखेर गाडी छाडेर अँध्यारोको फाइदा उठाउँदै भागेको प्रहरीले जनाएको छ ।
गाँजा र गाडीलाई नियन्त्रणमा लिए फरार व्यक्तिहरूको पहिचान र खोजी कार्य भइरहेको प्रहरीले जनाएको छ ।

























