
विराटनगर । जेनजी आन्दोलनको समयमा भदौ २४ गते सुनसरीको झुम्का कारागारबाट फरार भएका १ जना कैदी विराटनगरमा स्कुटर चोरी गरेर भाग्दै गर्दा पक्राउ परेका छन् ।
सुनसरीको इटहरी उपमहानगरपालिका–२ घर भएका २९ वर्षीय छोटु भनिने अभिषेक जैसवाल बुधबार राति १०ः३० बजेतिर पक्राउ परेका हुन् । विराटनगर महानगरपालिका–१ नेताचोकबाट को ३८ प ४९७२ नम्बरको स्कुटर चोरी गरेर भागेका जैसवाललाई विराटनगर–१६ दरैयाबाट पक्राउ गरिएको मोरङ प्रहरी प्रवक्ता डीएसपी कोपिला चुँडालले बताइन् ।
उनका अनुसार इलाका प्रहरी कार्यालय रानीका इन्स्पेक्टर कविन राई नेतृत्वको टोलीले चेकजाँचका क्रममा शंका लागेपछि स्कुटरलाई नियन्त्रणमा लिएको थियो । उक्त स्कुटरको कागजपत्र नभएको र सोधपुछका क्रममा जैसवाल झुम्का कारागारबाट भागेको पत्ता लागेको जानकारी चुँडालले दिइन् ।
उनका अनुसार जैसवाल यसअघि पनि मोटरसाइकल चोरी काण्डमा पक्राउ परेका थिए । चोरी मुद्दामा जिल्ला अदालत सुनसरीले दोषी ठहर गर्दै गत जेठ ३० गते उनलाई ५ महिना कैद र १० हजार जरिबानाको फैसला गरेको थियो ।
अदालतको फैसलापछि सजाय भुक्तान गरिरहेका उनी अन्य कैदीबन्दीसँगै भदौ २४ गते राति झुम्का कारागारबाट भागेका थिए । विराटनगरबाट पनि स्कुटर चोरी गरेर भारततिर लैजाँदै गर्दा नेपाल–भारत सीमा क्षेत्रबाट जैसवाल पक्राउ परेको प्रहरीले जनाएको छ ।
प्रहरीले चोरीको स्कुटर पनि बरामद गरेको छ । जैसवालविरुद्ध मोरङ प्रहरीले चोरी मुद्दा चलाउने तयारी गरेको छ । त्यसपछि बाँकी कैद भुक्तानका लागि झुम्का कारागारमा पठाइने प्रहरीले जनाएको छ ।
सिन्धुलीबाट भागेका कैदी पनि पक्राउ
जिल्ला कारागार सिन्धुलीबाट फरार भएका १ जना कैदी पनि पक्राउ परेका छन् । मोरङको धनपालथान गाउँपालिका–३ सोराभागबाट ३९ वर्षीय उपेन मण्डललाई पक्राउ गरिएको डीएसपी चुँडालले बताइन् ।
जबरजस्ती करणी मुद्दामा दोषी ठहर भएका उनी जेनजी आन्दोलनका बेला भदौ २४ गते फरार भएका थिए । जिल्ला अदालत मोरङले उनलाई ८ वर्ष ६ महिना कैद सजायको फैसला सुनाएको थियो ।
प्रहरीका अनुसार ७ वर्ष कैद सजाय भुक्तान गरिसकेका उनी अरु कैदीबन्दीसँगै भदौ २४ गते भागेका थिए । अब उनले १ वर्ष ६ महिना कैद सजाय भुक्तान गर्न बाँकी रहेको प्रहरीले जनाएको छ । प्रहरीका अनुसार उनलाई यसअघि जिल्ला कारागार मोरङबाट स्थानान्तरण गरेर सिन्धुली पठाएको पाइएको छ ।
कारागारबाट भागेपछि घरमै आएर बसेका उनलाई इलाका प्रहरी कार्यालय रंगेलीका इन्स्पेक्टर नरेन्द्रकुमार बोगटी नेतृत्वको टोलीले बिहीबार दिउँसो २ः४० बजेतिर पक्राउ गरेको हो । मण्डललाई बाँकी कैद भुक्तानका लागि जिल्ला कारागार सिन्धुली पठाउने तयारी भइरहेको डीएसपी चुँडालले बताइन् ।

























