
विराटनगर । संखुवासभाको खाँदबारीमा हत्या गरेको आरोपमा प्रहरीले एक जना युवकलाई पक्राउ गरेको छ ।
खाँदबारी नगरपालिका–९ का २६ वर्षीय विक्रम कुमाललाई छिमेकीको हत्या गरेको आरोपमा पक्राउ गरेको कोशी प्रदेश प्रहरी कार्यालयले जनाएको छ ।
विक्रमले कात्तिक ४ गते मंगलबार सोही ठाउँका ५५ वर्षीय कर्णबहादुर कुमालको घरेलु हतियार खुकुरी प्रहार गरी हत्या गरेको प्रहरीले जनाएको छ ।
प्रहरीको प्रारम्भिक अनुसन्धानबाट पुरानो रिसइबीका कारण आवेशमा आएर विक्रमले घर नजिकै कर्णबहादुरलाई खुकुरी प्रहार गरेको खुलेको छ । विक्रमले खुकुरी प्रहार गर्दा गम्भीर घाइते कर्णबहादुरको घटनास्थलमै मृत्यु भएको प्रहरीले जनाएको छ ।
जिल्ला प्रहरी कार्यालय संखुवासभा र तुम्लिङटार विमानस्थलका प्रहरी टोलीले कानुनी प्रक्रिया पूरा गरी शवलाई पोस्टमार्टमका लागि जिल्ला अस्पताल खाँदबारी पठाएको ।
हत्यामा प्रयोग गरिएको खुकुरीसहित विक्रमलाई नियन्त्रणमा लिएर प्रहरीले थप अनुसन्धान गरिरहेको जनाएको छ।

























