सांकेतिक तस्बिर ।विराटनगर । झापाको भद्रपुर र सुनसरीको धरानमा खुकुरी प्रहार हुँदा महिला र किशोरी घाइते भएका छन् ।
झापाको भद्रपुर नगरपालिका–१० सयपत्री मार्गमा अज्ञात समूहको खुकुरी प्रहारबाट २६ वर्षीया सुरुेखा मुखिया घाइते भएकी हुन् । २ जना अज्ञात पुरुषले मुखियाको बायाँ हात र गालामा खुकुरीले हानेको प्रहरीले जनाएको छ ।
घाइते मुखियाको स्थानीय ओमसाई पाथीभरा अस्पतालमा उपचार भइरहेको छ । बुधबार दिउँसोको घटनामा परेर घाइते भएकी उनको अवस्था सामान्य रहेको झापा प्रहरीका प्रवक्ता डीएसपी खगेन्द्र खडकाले जानकारी दिए ।
घटनापछि कालो र निलो मोटरसाइकलमा आएका आक्रमणकारी फरार छन् । उनीहरूको परिचय खुल्न बाँकी छ । पहिचानको प्रयास गर्दै खोजी तीव्र पारिएको प्रहरीले जनाएको छ ।
त्यस्तै, धरान उपमहानगरपालिका–११ मा बुधबार राति खुकुरी प्रहार हुँदा १५ वर्षीया किशोरी घाइते भएकी छन् । धरान–५ बस्ने सन्तोष भुजेलले सामान्य वादविवादका क्रममा सोही स्थानकी किशोरी आयुस रम्तेलमाथि खुकुरी प्रहार गरेको प्रहरीले जनाएको छ ।
राति करिब ११ः३० बजे भएको उक्त घटनामा परेर घाइते भएकी रम्तेलको बीपी कोइराला स्वास्थ्य विज्ञान प्रतिष्ठान धरानमा उपचार जारी छ । घटनामा संलग्न भुजेललाई प्रहरीले नियन्त्रणमा लिएको छ ।
रम्तेलमाथि खुकुरी प्रहार हुनुको कारण खुल्न सकेको छैन । प्रहरीले घटनाको अनुसन्धान गरिरहेको छ ।

























