सुन देखाउने बहानामा सराेज शर्माकाे हत्या, मामाभान्जा पक्राउ

Share this
743shares
मुलुकी खबर
मुलुकी खबर
clock२०८२ कात्तिक १६, आइतबार १९:१२

विराटनगर । झापा, शिवसत्ताक्षी नगरपालिका–१० का सरोज शर्माकाे  सुन खरिदबिक्रीको बहानामा हत्या भएकाे खुलेकाे छ । काठमाडौं बस्दै आएका शर्मालाई सस्तो सुन देखाउने बहानामा  अर्जुनधारा नगरपालिका–४ स्थित दहीझोडा सामुदायिक वनमा लगेर हत्या भएकाे हाे । घटनामा संलग्न दुई जना आरोपीलाई प्रहरीले पक्राउ गरेको छ ।

दसैँ मान्न घर आएका सरोज शर्मा सस्तो सुनको खोजीमा थिए । सोही टोलका साथी सुनिल साहलाई उनले सुन चाहिएको बताएका थिए।  शर्माले आफू थोरै सुन किन्ने र काठमाडौंमा थप ग्राहक रहेको जानकारी दिएका थिए । छठपछि काठमाडौं फर्किने तयारीमा रहेका शर्मासँग रहेको पैसा लुट्ने योजना  सुनिल र उनका नाताले भान्जा पर्ने छिमेकी २३ वर्षीय राहुल साहले बनाएका थिए । सुन देखाउने बाहानामा जंगल लगेर शर्मालाई बेहोस बनाई अपहरण गर्ने, पैसा लुट्ने र परिवारसँग फिरौती माग्ने याेजना बनाएका थिए । तर, हताैडाले प्रहार गरी शर्माकाे हत्या गरे ।

यस्ताे थियाे घटना

कात्तिक ९ गते बेलुका पूर्वयोजनाअनुसार शर्मालाई सुन देखाउन भन्दै दहीझोडा सामुदायिक वनमा लगियो । सुन राखिएको स्थान भन्दै जंगलमा माटो खोस्रिरहेकै बेला शर्माको टाउकोमा पछाडिबाट हतौडाले प्रहार गरियो । जिल्ला प्रहरी कार्यालय झापाका प्रवक्ता डिएसपी खगेन्द्रबहादुर खड्काका अनुसार, हतौडा प्रहारपछि शर्मा चिच्याएकाले आवाज बाहिर नजाओस् भनी पटकपटक टाउकोमा प्रहार गरी उनको हत्या  गरेकाे देखिन्छ ।

घटनास्थलमै शर्माको मृत्यु हुँदा साँझ परिसकेको थियो । आरोपीहरूले शर्माको शवलाई सेउलाले छोपेर उनी सवार गाडी जंगलमै छाडेर सुनिलको गाडीमा फर्किए । राति एक जना भारतीय नागरिकलाई लिएर फेरि घटनास्थल पुगे । डिएसपी खड्काका अनुसार, भारतीय नागरिकको सहयोगमा शर्माको शवलाई मृतककै गाडीमा राखेर हुलाकी राजमार्गअन्तर्गत झापा गाउँपालिका खण्डको बिरिङ खोलाको पुलमुनि लगेर गाडिएको थियो । त्यसपछि प्रमाण नष्ट गर्न शर्माको गाडीलाई जलाइएको थियो । गाडी जलाउने क्रममा सुनिलको दुवै हात आगोले जलेको प्रहरीले जनाएको छ ।

भाग्दा भाग्दै पक्राउ

शर्मा कात्तिक ९ गते ‘कार धुनु छ’ भन्दै घरबाट निस्किएका थिए र त्यसपछि सम्पर्कविहीन भए । परिवारले भोलिपल्ट प्रहरी कार्यालयमा खोजीका लागि निवेदन दिएपछि अनुसन्धान सुरु भएको थियो । अनुसन्धानका क्रममा गत बिहीबार मेचीनगर–१३ स्थित हातेमालो सामुदायिक वनभित्र शर्माको प्रदेश ०१–०३ च ७१९४ नम्बरको कार जलेको अवस्थामा फेला परेको थियो । गाडी भेटिएको दुई दिनपछि शनिबार शर्माको शव फेला परेको हो ।

मुख्य योजनाकार सुनिल साहलाई भारततर्फ भाग्दै गर्दा विराटनगरको सीमावर्ती क्षेत्र रानीबाट पक्राउ गरिएको हो । राहुल साहलाई भने घरमै लुकेर बसेको अवस्थामा पक्राउ गरेकाे हाे । शव व्यवस्थापनमा प्रयोग भएका भारतीय नागरिक भने फरार छन् । फरार रहेका व्यक्ति सुनिलका नातेदार हुन् ।

पक्राउ परेका दुवै जनामाथि जिल्ला अदालत झापाबाट ७ दिनको म्याद थप गरी थप अनुसन्धान भइरहेको झापा प्रहरीले जनाएको छ। घटनाका मुख्य योजनाकार सुनिल यसअघि पनि आपराधिक क्रियाकलापमा संलग्न रहेको पाइएको छ । करिब १० वर्षअघि एसएलसी परीक्षा चलिरहेका बेला उनी मोटरसाइकल चोरीको मुद्दामा पक्राउ परेका थिए । त्यसयता उनी लागुऔषध मुद्दामा पनि पक्राउ परेका थिए । झगडालु प्रवृत्तिका कारण टोलका बासिन्दा उनीसँग आजित भएको स्थानीयले बताएका छन् । घटना सार्वजनिक भएपछि आक्रोशित स्थानीयले दुवै आरोपीको घर तोडफोड गरेका थिए ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.