
विराटनगर । ठूलो परिमाणको लागुऔषध खैरो हेरोइन (ब्राउन सुगर)सहित विराटनगरका अलगअलग स्थानबाट ४ जना पक्राउ परेका छन् । पक्राउ पर्नेमा २ जना भारतीय नागरिक छन् ।
विराटनगर महानगरपालिका–१३ बाट २ जना पक्राउ परेका छन् । सडकको साइडमा रोकेर राखिएको को १४ प ४५८७ मोटरसाइकलमा बसेर कुराकानी गरिरहेका विराटनगर महानगरपालिका–८ का २८ वर्षीय अजयकुमार मुखिया र विराटनगर–१६ का अजयकुमार राउतलाई मंगलबार साँझ ५ बजेतिर पक्राउ गरिएको मोरङ प्रहरी प्रवक्ता डीएसपी कोपिला चुँडालले बताइन् ।
उनका अनुसार लागुऔषध नियन्त्रण ब्युरो विराटनगरबाट खटिएको सई प्रकाशचन्द्र अधिकारी नेतृत्वको टोलीले शंकास्पद अवस्थामा रहेका उनीहरुलाई चेकजाँच गर्दा मुखियाको साथबाट १ सय ४० ग्राम १८ मिलिग्राम खैरो हेरोइन बरामद भएको थियो । दुवै जनालाई इलाका प्रहरी कार्यालय रानीको हिरासतमा राखेर थप अनुसन्धान अघि बढाइएको प्रहरीले जनाएको छ ।
त्यस्तै, मंगलबार राति ८ः४५ बजेतिर विराटनगर–११ बसपार्कबाट २ जना भारतीय पक्राउ परेका छन् । लागुऔषध नियन्त्रण ब्युरो विराटनगरका सई प्रकाशचन्द्र अधिकारी र वडा प्रहरी कार्यालय विराटनगरबाट इन्स्पेक्टर अप्रिल चापागाईं नेतृत्वको संयुक्त टोलीले भारत बिहार फारबिसगन्ज कोहलियाका २८ वर्षीय मोहमद मोजाहित र फारबिसगन्ज पलासीका २० वर्षीय राजकुमार दासलाई पक्राउ गरेको हो ।
पक्राउ परेकामध्ये मोजाहितले लगाएको जम्फरमा प्लाष्टिकमा पोको पारेर राखेको अवस्थामा १ सय ५२ ग्राम ब्राउन सुगर फेला परेको डीएसपी चुँडालले बताइन् । उनका अनुसार दुवै जनालाई नियन्त्रणमा लिएर जिल्ला प्रहरी कार्यालय मोरङको हिरासतमा राखी थप अनुसन्धान अघि बढाइएको छ ।

























