अपराधिक पृष्ठभूमिकालाई ‘फोर्स’को जिम्मेवारी, एमालेले राजनीतिक जोखिम बढाएको विश्लेषण

Share this
690shares
मुलुकी खबर
मुलुकी खबर
clock२०८२ मंसिर ५, शुक्रबार १८:३६

काठमाडौं । नेकपा (एमाले)ले शुक्रबार काठमाडौंमा आयोजना गरेको भव्य समारोहमार्फत सार्वजनिक गरेको ‘नेसनल भोलेन्टियर्स फोर्स’को नेतृत्व आपराधिक पृष्ठभूमि बोकेका व्यक्तिले पाएका छन् ।

फोर्सको नेतृत्व एमालेले अपराधिक पृष्ठभूमिका व्यक्तिलाई सुम्पिएपछि नेपाली राजनीतिमा नयाँ विवादको ढोका खुल्नुका साथै पार्टीभित्रै नैतिकता र नेतृत्व छनोटको मापदण्डमाथि गम्भीर प्रश्न खडा भएको छ । अध्यक्ष केपी शर्मा ओलीको प्रत्यक्ष उपस्थितिमा नेता भानुभक्त ढकालले ११ सदस्यीय उक्त संरचना घोषणा गर्दा सिन्धुलीका ४३ वर्षीय पुष्पराज श्रेष्ठलाई संयोजक (कमान्डर)को भूमिकामा अगाडि सारेका थिए ।

तर, प्रहरीको क्रिमिनल रेकर्ड सिस्टम (सीआरएस)बाट श्रेष्ठविरुद्ध ज्यान मार्ने उद्योग, अभद्र व्यवहार र अपहरणसहित ७ वटा फौजदारी मुद्दा दर्ता रहेको तथ्य सार्वजनिक भएपछि नेतृत्व छनोटको यही क्षण एमालेका लागि चुनौतीपूर्ण मोड बनेर प्रस्तुत भएको छ । श्रेष्ठ राजनीतिक रूपमा अपरिचित नाम भने होइनन् ।

२०६३ सालदेखि नै अपराधसँग जोडिएको पृष्ठभूमिबाट अघि बढेका उनी माओवादी हुँदै एमालेसम्म पुगेका व्यक्ति हुन् । उनीविरुद्ध पहिलो मुद्दा सिन्धुलीका गगन सिंहमाथि ज्यानमार्ने उद्देश्यले गरिएको कुटपिट थियो । जुन घटनाले २०६३ मै उनीविरुद्ध फौजदारी अभियोग दर्ता गराएको थियो ।

त्यसपछि पनि अपराधिक घटना बढ्दै गए । २०६४ मा विजय मुनालमाथि हतियार प्रहार गरी घाइते बनाएको काण्डमा अर्को मुद्दा दर्ता भयो । २०६५ असोजमा काठमाडौं–३२ का अविनाश रिजालमाथि गोली प्रहार गरी हत्या प्रयास गरेको आरोपमा उनी पुनः पक्राउ परे । यी घटनाहरूबीच २०६७ मा सिन्धुलीकै राजन घिसिङमाथि गरेको कुटपिटले अपराधको अर्को फाइल थपियो ।

२०७० फागुनमा सिन्धुलीकै जीवन श्रेष्ठलाई अपहरण र कुटपिट गरेको आरोपमा उनीविरुद्ध अर्को मुद्दा चल्यो । यिनै विविध घटनाले उनको ‘क्रिमिनल’ पृष्ठभूमि ७ मुद्दासम्म फैलिएको प्रहरी तथ्यांकले देखाउँछ ।

उनलाई पछिल्लो पटक २०७५ भदौ २६ मा काठमाडौं उपत्यका अपराध अनुसन्धान कार्यालयको टोलीले रातोपुलबाट पक्राउ गरेको थियो । त्यतिबेला अपराध अनुसन्धान कार्यालयको प्रमुख धीरजप्रताप सिंह (हाल अवकाशप्राप्त पूर्वआईजीपी) थिए ।

ओखलढुंगाका रामबहादुर कटुवाललाई ज्यान मार्ने धम्की दिएर रकम नदिएको उजुरीका आधारमा उनी पक्राउ परेका थिए । कटुवालले घर निर्माणको लागि श्रेष्ठलाई ठेक्का दिएका थिए । तर, निर्माणपछि बिल माग्दा उल्टै धम्की र कुटपिटको घटना भएको थियो । त्यसबेला सार्वजनिक अपराध (अभद्र व्यवहार)मा उनीमाथि मुद्दा दर्ता गरिएको थियो ।

त्यसअघि २०७३ को पुस ४ मा गणेशकुमार कुँवरलाई साथीहरूकै डेरामा लगेर कुटपिट गर्दै ५० हजार रुपैयाँ, सुनको औंठी, मोबाइल र ११ लाख रुपैयाँ बराबरको चेक लुटेको अभियोगमा पनि उनी पक्राउ परेका थिए । जहाँ उनीसहित ५ जना पक्राउ परेका थिए ।

यो सबै पृष्ठभूमि हुँदाहुँदै पनि उनी राजनीतिमा अघि बढ्दै गए । माओवादी शान्ति प्रक्रियामा आएसँगै उनी वाईसीएलको केन्द्रीय सदस्य र सिन्धुली जिल्ला इन्चार्ज बने । त्यसपछि नेकपा (एमाले–माओवादी) एकीकरण हुँदा उनी युवा संघतर्फ लागे ।

तत्कालीन गृहमन्त्री रामबहादुर थापा ‘बादल’को निकट मानिने उनी ठेक्कापट्टा र असुलीमा संलग्न रहेको आरोपमा पटक–पटक चर्चित बने । नेकपा विभाजनपछि उनी एमालेमै रहेका थिए । र अहिले उनी ‘नेसनल भोलेन्टियर्स फोर्स’को संयोजक बन्न सफल भएका छन् ।

समारोहमा संयोजकको जिम्मेवारी पाउनेबित्तिकै श्रेष्ठले दिएको भाषणले परिस्थितिलाई झनै तनावपूर्ण बनाइदिएको छ । उनका अभिव्यक्तिले स्वयं यो संरचना कता उन्मुख छ भन्ने संकेत गर्छ । श्रेष्ठले पार्टीले दिएको जिम्मेवारी ‘एक रत्ति पनि मर्न नदिने’ भन्दै जस्तोसुकै अवस्था आए पनि सडकमा टाउकोमा रातो कफन बाँधेर भिड्न तयार रहेको भाषिक कठोरता व्यक्त गरे ।

उनले सरकारलाई सिधै चेतावनी दिंदै आफूहरूलाई रोक्ने प्रयास गरेमा त्यसको प्रतिकार सडकमै गर्ने बताए । नेताहरूको घरसम्म लोकेसन ट्र्याक गरिएको आरोप लगाउँदै उनले आफूहरूले पनि त्यसै गरी सरकार र अन्य पक्षहरूको लोकेसन हेरेको भन्दै ‘हामी तपाईंहरूको घर–घर घेर्नेछौँ’ भन्ने अडान राखे ।

उनको यस्तो खुलेआम चेतावनीले ‘नेसनल भोलेन्टियर्स फोर्स’ वास्तवमै स्वयंसेवी संगठन हो कि राजनीतिक टकरावमा प्रयोग हुने आक्रामक दस्ता भन्ने आशंका उब्जिएको छ । विशेषगरी जेनजी आन्दोलनपछि उत्पन्न राजनीतिक ध्रुवीकरण, सरकार–दलहरुबीचको घर्षण र सार्वजनिक सुरक्षा संवेदनशील बनिरहेको अवस्थामा अपराधै अपराधले घेरिएका व्यक्तिलाई नेतृत्व सुम्पिनुले लोकतान्त्रिक मूल्यमान्यतामा प्रत्यक्ष प्रश्न उठाएको छ ।

देश राजनीतिक रूपमा अशान्त छ । सत्ता र सडकबीचको दूरी दिनहुँ बढ्दैछ । यस्तो घडीमा मुद्दैमुद्दा खेपेका पुष्पराज श्रेष्ठले ‘नेसनल भोलेन्टियर्स फोर्स’जस्तो संगठनको नेतृत्व पाउनुले ठूलो राजनीतिक जोखिम बढाएको विश्लेषण गरिएको छ ।

अब यो संरचना स्वयंसेवी भूमिकामा सीमित रहन्छ कि सडकमा नयाँ शक्तिको रूपमा उदाउँछ वा राजनीतिक द्वन्द्वको स्रोत बन्छ भन्ने प्रश्न उठेको छ । एमालेको यो निर्णयले १ व्यक्तिको उन्नतिको बहस नभएर देशको राजनीतिक संस्कृतिको दिशाबोधबारे गम्भीर प्रश्न खडा गरेको विश्लेषकहरु बताउँछन् ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.