मानव बेचबिखनमा १५ वर्षदेखि फरार प्रतिवादी मोरङको सुन्दरहरैँचाबाट पक्राउ

Share this
662shares
मुलुकी खबर
मुलुकी खबर
clock२०८२ मंसिर ६, शनिबार १४:०७

विराटनगर । मानव बेचबिखन मुद्दामा लामो समयदेखि फरार रहेकी प्रतिवादी मोरङको सुन्दरहरैँचा नगरपालिका–६ की ५० वर्षीया बिना राई (लिम्बू)लाई प्रहरीले पक्राउ गरेको छ ।

विगत १५ वर्षदेखि फरार रहेकी बिनालाई प्रहरी चौकी गछियाबाट खटिएको सई (प्रहरी नायव निरीक्षक) गणेश दाहाल नेतृत्वको टोलीले बिहीबार राति घरबाटै पक्राउ गरेको हो । प्रहरीका अनुसार उनी लामो समयदेखि लुकिछिपी बस्दै आएकी थिइन् ।

बिनाविरुद्ध २०६७ साल असोज ५ गते इलाका प्रहरी कार्यालय बेलबारीमा किटानी जाहेरी परेको थियो । प्रतिवादी लामो समयदेखि फरार हुँदा कार्यान्वयनमा जान नसकेर जाहेरी वर्षौंदेखि अलपत्र परेको थियो । बिनाले आकर्षक कमाइको लोभ देखाएर वैदेशिक रोजगारीमा पठाउने भन्दै भारतको नयाँ दिल्लीको बाटो प्रयोग गरेर १ जना नेपाली महिलालाई साउदी अरब पुर्याएको प्रहरीको प्रारम्भिक अनुसन्धानबाट खुलेको छ ।

प्रहरीका अनुसार ती महिलालाई वैदेशिक रोजागारीमा पठाउने र आकर्षक कमाइ हुने प्रलोभन देखाएर नयाँ दिल्ली हुँदै साउदी अरब पुर्याइएको थियो । पछि नेपाली राजदूतावासको सहयोगमा नेपाल फर्किएर पीडितले प्रहरीमा जाहेरी दिएकी थिइन् । आफूविरुद्ध जाहेरी परेको थाहा पाउनसाथ बिना फरार भइन् ।

राजदूतावासले उद्धार गरेर नेपाल पठाएकी महिलाले कानुनी कारबाहीको बाटो रोजेको भएपनि प्रतिवादी पक्राउ नपर्दा लामो समयदेखि जाहेरी ‘पेन्डिङ’मा थियो । पीडितले न्याय पाउन सकिरहेकी थिइनन् । बिनाविरुद्ध मानव बेचबिखन तथा ओसारपसार मुद्दा चलाउन प्रहरीले शुक्रबार अदालतबाट म्याद थप गरेर अनुसन्धानको बाँकी प्रक्रिया अघि बढाएको छ ।

उनलाई इलाका प्रहरी कार्यालय बेलबारीको हिरासतमा राखिएको छ । बेलबारीका इन्स्पेक्टर राजीव गिरी नेतृत्वको टोलीले थप अनुसन्धान गरिरहेको छ । मुद्दा पुरानो भएपनि कानुनी रुपमा अझै निष्कर्षमा नपुगेको र प्रतिवादी पक्राउ भएसँगै अब बाँकी प्रक्रिया अघि बढ्ने मोरङ प्रहरी प्रमुख एसपी कवित कटवालले बताए ।

प्रहरीका अनुसार साउदी पुगेपछि पीडितले अत्यधिक श्रमशोषण र दुर्व्यवहार सहनुपरेको थियो । ‘साउदीमा ठूलै पीडा सहेर बसेकी महिला दूतावासको सहयोगमा नेपाल फर्किन सफल भएको पाइयो । जाहेरी परेको भए पनि प्रतिवादी फरार भएकाले मुद्दा अघि बढ्न सकेको थिएन । अब पक्राउ भइसकेकाले प्रमाणका आधारमा प्रक्रिया अघि बढ्छ,’ एसपी कटवालले भने ।

नेपालमा वैदेशिक रोजगारीका नाममा हुने ठगी, प्रलोभन र मानव बेचबिखनका मुद्दाहरू वर्षौंदेखि संवेदनशील विषय बनेका छन् । मानव बेचबिखन तथा ओसारपसार (नियन्त्रण) ऐन, २०६४ अनुरूप विदेश पुर्याएर श्रमशोषण वा बन्धनमा राख्ने कार्य गम्भीर अपराध मानिन्छ । त्यहाँमाथि साउदी अरबमा नेपाली महिलालाई पठाउनै पाइँदैन ।

मानव बेचबिखन प्रमाणित भए १० देखि १५ वर्षसम्म कैद सजाय, आर्थिक जरिबाना र राज्यतर्फबाट कठोर कारबाही हुने प्रावधान छ । तर, प्रतिवादी फरार भएर मुद्दाहरू लामो समय थन्किनु, प्रमाण संकलनमा ढिलाइ हुनु र पीडितले न्याय पाउन वर्षौं कुर्नुपर्ने जस्ता समस्या नेपालका धेरै घटनामा दोहोरिने गर्छन् । यस घटनामा पनि पीडितले नेपाल फर्किएर उजुरी दिएको १५ वर्षपछि मात्र प्रतिवादीलाई पक्राउ गर्न प्रहरी सफल भएको छ ।

यो घटनामा पीडित विदेशमा भएका बेला दूतावासले तयार पारेको जोखिम मूल्यांकन, श्रमशोषण सम्बन्धी विवरण र घटनासँग जोडिएका अन्य कागजात एवं प्रहरीको अनुसन्धान प्रतिवेदनका आधारमा अदालतमा मुद्दा दर्ता गरिनेछ । समयावधि लामो समय भइसके पनि संवेदनशीलतालाई ध्यानमा राख्दै ‘उच्च प्राथमिकता’मा राखेर घटनाको अनुसन्धान अघि बढाइएको एसपी कटवालले बताए ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.