
विराटनगर । प्रहरीले आइतबार मोरङ, झापा र सुनसरीका विभिन्न स्थानबाट अवैध लागूऔषधसहित ५ जनालाई पक्राउ गरेको छ। मोरङ, रतुवामाई नगरपालिका–२, डोरियाबाट आइतबार साँझ ब्राउनसुगरजस्तो देखिने ४ ग्राम १० मिलिग्राम पदार्थसहित दुई जना पक्राउ परेका छन्। उर्लाबारी नगरपालिका–१ बस्ने २३ वर्षीय दीपेश धिमाल र ३३ वर्षीय पूर्णबहादुर जोगीलाई प्र.१–०२–०४७ प ८००२ नम्बरको मोटरसाइकलमा भारतबाट नेपाल आउँदै गर्दा प्रहरीले नियन्त्रणमा लिएको हो।
झापा गाउँपालिका–४, लसुनाबाट आइतबार दिउँसो ब्राउनसुगरजस्तो देखिने १ ग्राम २५ मिलिग्राम पदार्थसहित शिवसताक्षी नगरपालिका–११ बस्ने २६ वर्षीय निशान न्यौपानेसमेत दुई जना पक्राउ परेका छन्। उनीहरू भारतबाट पैदल नेपालतर्फ आउँदै गर्दा पक्राउ परेका हुन्।
वराहक्षेत्र नगरपालिका–७, बत्तीस टोलबाट आइतबार राति २७ वर्षीय दिनेश तामाङ पक्राउ परेका छन्। पर्वत मोदी गाउँपालिका–६ घर भई सुनसरीको वराहक्षेत्र–६, ठाकुरबारी बस्ने तामाङलाई प्रहरीले ८७ ट्याब्लेट ट्रामाडोल र ८८ ट्याब्लेट स्पास्पेनसहित नियन्त्रणमा लिएको हो। पक्राउ परेका सबै अभियुक्तमाथि सम्बन्धित प्रहरी कार्यालयहरूले थप अनुसन्धान गरिरहेका छन्।

























