
काठमाडौँ । विभिन्न कसुरमा ८ पटकसम्म मुद्दा खेपिसकेका एक व्यक्ति पुनः चोरीकै आरोपमा नवौँ पटक पक्राउ परेका छन्। काठमाडौँ उपत्यका अपराध अनुसन्धान कार्यालयको टोलीले दोलखाको गौरीशंकरका २३ वर्षीय अब्राहम थामी र उनका सहयोगी गोविन थामीलाई पक्राउ गरेको हो।
पुस १५ गते तीनकुने र सिनामंगलमा पार्किङ गरी राखिएका २२० सीसीका दुईवटा पल्सर मोटरसाइकल चोरी भएपछि प्रहरीले उनीहरूमाथि निगरानी बढाएको थियो। अनुसन्धानका क्रममा पक्राउ परेका अब्राहमको आपराधिक रेकर्ड निकै लामो देखिएको छ। २०७६ सालदेखि हालसम्म उनीमाथि चोरी, डाँका, अभद्र व्यवहार र सवारी ज्यान लगायतका गम्भीर कसुरमा आठ पटक मुद्दा चलिसकेको भेटिएको छ।
२०७७ सालमा मात्रै उनीमाथि तीनवटा फरक-फरक चोरीका मुद्दा दर्ता भएका थिए भने २०८० सालमा दोलखाबाट सवारी ज्यानको मुद्दा चलेको थियो। बारम्बार कानुनी फन्दामा परेर छुट्ने र पुनः सोही प्रकृतिको अपराधमा संलग्न हुने उनको प्रवृत्तिले प्रहरीलाई समेत चकित तुल्याएको छ। पक्राउ परेका दुवै अभियुक्तलाई थप कारबाहीका लागि जिल्ला प्रहरी परिसर काठमाडौँ पठाइएको छ।

























