
विराटनगर । सनम शाक्यको अपहरण, शरीर बन्धक तथा ज्यान सम्बन्धी कसूर (३३ किलो सुन प्रकरण) का फरार प्रतिवादीलाई प्रहरीले पक्राउ गरेको छ। जिल्ला प्रहरी कार्यालय मोरङले बिहीबार प्रेस विज्ञप्ति जारी गर्दै लामो समयदेखि फरार रहेका मकवानपुरका ३३ वर्षीय सुरेन्द्र गौतम पक्राउ परेको जानकारी दिएको हो।
गौतमलाई जिल्ला प्रहरी परिसर काठमाडौँ र जिल्ला प्रहरी कार्यालय मोरङको संयुक्त समन्वयमा माघ १ गते काठमाडौँबाट नियन्त्रणमा लिइएको हो। पक्राउ परेलगतै उनलाई आवश्यक कारबाहीका लागि जिल्ला अदालत मोरङ, विराटनगरमा बुझाइएको छ।
यो मुद्दा २०७४ फागुन ३ गते जिल्ला प्रहरी कार्यालय मोरङमा दर्ता भएको थियो। सञ्जीव शाक्यको जाहेरीले नेपाल सरकार वादी रहेको यस मुद्दामा ‘गोरे’ भन्ने चूडामणि उप्रेतीसहित ६३ जनालाई प्रतिवादी बनाइएको थियो। गौतम सोही समयदेखि नै फरार सूचीमा रहेका थिए। ल्ला प्रहरी कार्यालय मोरङका सूचना अधिकारी प्रनाउ हरिनन्दन चौधरीका अनुसार फरार प्रतिवादीहरूको खोजी कार्यलाई तीव्रता दिने क्रममा यो सफलता मिलेको हो।

























