
विराटनगर । बालिकालाई बलात्कार गरेको आरोपमा पक्राउ परेका मोरङको सुनवर्षी नगरपालिकाका वडा सचिव ३१ वर्षीय ईश्वरराज रेग्मी कारागार चलान भएका छन् ।
सुनवर्षी–२ का वडा सचिव रेग्मीलाई जिल्ला अदालत मोरङले थुनामा राखेर मुद्दाको पुर्पक्ष गर्न आदेश दिएको थियो । न्यायाधीश मणिराम ज्ञवालीको इजलासले उक्त आदेश दिएको हो ।
तत्काल प्राप्त प्रमाणका आधारमा पछि ठहरे बमोजिम हुने गरी थुनामा राखेर मुद्दाको पुर्पक्ष गर्न पुस १७ गते आदेश भएको अदालतका सूचना अधिकारी हेमबहादुर बुढाथोकीले बताए । उनका अनुसार आदेशपछि रेग्मीलाई जिल्ला कारागार मोरङ चलान गरिएको छ ।
खोटाङको ऐँसेलुखर्क गाउँपालिका–७ घर भएका रेग्मीलाई प्रहरीले गत मंसिर २१ गते पक्राउ गरेर अनुसन्धानको दायरामा ल्याएको थियो । कक्षा १० मा अध्ययनरत १७ वर्षीया बालिकालाई बलात्कार (जबरजस्ती करणी) गरेको आरोपमा उनी पक्राउ परेका थिए ।
बालिकालाई मंसिर १४ गते राति आफ्नै कोठामा राखेर बलात्कार गरेको भनेर रेग्मीविरुद्ध प्रहरीमा जाहेरी परेको थियो । त्यो दिन बालिका साथीको वर्थ–डे (जन्मदिन) मनाउन भनेर घरबाट हिँडेकी थिइन् ।
भोलिपल्ट पनि घर नफर्किएपछि अभिभावकले प्रहरीलाई खबर गरेर खोजी सुरु गरेका थिए । खोजी गरेर बालिकालाई फेला पारेपछि सोधपुछ गर्दा घटना बाहिर आएको प्रहरीले जनाएको छ ।
प्रहरीले रेग्मीविरुद्ध जबरजस्ती करणी मुद्दामा अनुसन्धान गरेको थियो । प्रहरीले अनुसन्धान सकेर मिसिल (अनुसन्धान प्रतिवेदन) बुझाएपछि सरकारी वकिल कार्यालयले अदालतमा मुद्दा दायर गरेको हो ।
अदालतमा रेग्मीको बयान सकिएपछि वादी नेपाल सरकार र प्रतिवादीतर्फका कानुन व्यवसायीबीच थुनछेक बहस भएको थियो । थुनछेक बहस सकिएपछि इजलासबाट थुनामा पठाउन आदेश भएको अदालतका सूचना अधिकारी बुढाथोकीले बताए । यो मुद्दाको फैसला पछि हुने छ ।

























