
विराटनगर । उदयपुरको बेलका नगरपालिका –३ मा श्रीमानले श्रीमतीको हत्या गरेका छन् । बेलका– ३ किराँत चोकका खगेन्द्र राईले श्रीमती गंगा राईलाई छुरा प्रहार गरी हत्या गरेको प्रहरीले जनाएको छ ।
प्रहरीका अनुसार दुवै जनाबीच झगडा हुँदा खगेन्द्रले छुरा प्रहार गर्दा गम्भीर घाइते भएकी गंगाको धरानस्थित बिपी कोइराला स्वास्थ्य विज्ञान प्रतिष्ठान उपचारको क्रममा मृत्यु भएको हो ।
श्रीमतीलाई छुरा प्रहार गरी घाइते बनाएका खगेन्द्रले पनि आफ्नो शरीरका विभिन्न ठाउँमा छुरा प्रहार गरी आत्महत्याको प्रयास गरेका थिए ।
दुवै जनालाई स्थानीयले देखेर तत्कालै उपचारका लागि धरान पठाएका थिए । उपचारका क्रममा श्रीमतीको मृत्यु भयो भने खगेन्द्रको प्रहरीको निगरानीमा उपचार भइरहेको छ । घटनाको सम्बन्धमा थप अनुसन्धान अघि बढाएको प्रहरीले जनाएको छ ।

























