
विराटनगर । झापा दमकको एउटा होटलमा लागुऔषध खैरो हेरोइन (ब्राउन सुगर)को कारोबार भइरहेको पाइएको छ ।
विशेष सूचनाका आधारमा प्रहरीले कञ्चनजंघा होटलमा छापा हानेको छ । इलाका प्रहरी कार्यालय दमकका डीएसपी किशोर लम्साल नेतृत्वको टोलीले सोमबार छापा हानेर कारोबारमा संलग्न युवतीसहित ३ जनालाई पक्राउ गरेको छ ।
पक्राउ पर्नेमा मोरङको मिक्लाजुङ गाउँपालिका–३ की १९ वर्षीया मनिका राई, दमक नगरपालिका–१ का २६ वर्षीय सुरज कुमाल र ३१ वर्षीय कृष्णबहादुर श्रेष्ठ रहेका छन् । उनीहरुलाई लागुऔषध ब्राउन सुगरसहित पक्राउ गरिएको प्रहरीले जनाएको छ ।
प्रहरीका अनुसार दमकको कञ्चनजंघा होटलमा लागुऔषध कारोबार भइरहेको छ भन्ने विशेष सूचनाका आधारमा छापा मार्दा उनीहरू लागुऔषध र नगदसहित फेला परेका थिए । पक्राउ परेकाहरू रहेको होटलको कोठाबाट ब्राउन सुगर ६ ग्राम ७ सय ८० मिलिग्रामका साथै ३३ हजार रुपैयाँ बरामद गरिएको झापा प्रहरीका प्रवक्ता डीएसपी खगेन्द्रबहादुर खड्काले बताए ।
पक्राउ परेकालाई इलाका प्रहरी कार्यालय दमककको हिरासतमा राखिएको छ । उनीहरुविरुद्ध लागुऔषध ऐनअन्तर्गतको मुद्दा चलाउन थप अनुसन्धान अघि बढाइने प्रहरीले जनाएको छ ।

























