
विराटनगर । झापाको बिर्तामोडबाट घरेलु हतियार, नगद र ठूलो परिमाणको लागुऔषध खैरो हेरोइन (ब्राउन सुगर)सहित कारोबारीलाई प्रहरीले मंगलबार पक्राउ गरेको छ ।
इलाका प्रहरी कार्यालय अनारमनी र लागुऔषध नियन्त्रण ब्युरो काँकडभिट्टाबाट खटिएको संयुक्त टोलीले बिर्तामोड नगरपालिका–१ सूर्यनगरस्थित अजय राजवंशीको घरमा छापा मारेको थियो । त्यस क्रममा ठूलो मात्रामा लागुऔषध तथा घरेलु हतियार र नगद बरामद भएको छ ।
अजयको घरको कोठामा दिउँसो १ः३० बजेतिर छापा मार्दा ब्राउन सुगर १२३ ग्राम १८० मिलिग्राम ब्राउन सुगर, नेपाली २ लाख ६७ हजार रूपैयाँ र भारतीय २९ हजार ५ सय रूपैयाँ बरामद भएको झापा प्रहरीका प्रवक्ता डीएसपी खगेन्द्रबहादुर खड्काले बताए । उनका अनुसार चक्कु, कैँचीसहितका घरेलु हतियार र लागुऔषधको कारोबारमा प्रयोग गरिने डिजिटल तराजु पनि बरामद भएको छ ।
पक्राउ परेका अजयलाई बरामद भएको लागुऔषधसहितका सामान र नगदसहित इलाका प्रहरी कार्यालय अनारमनीमा राखिएको छ । उनीविरुद्ध लागुऔषध ऐनअन्तर्गतको मुद्दा चलाउन थप अनुसन्धान भइरहेको प्रहरीले जनाएको छ ।
यस विषयमा इलाका प्रहरी कार्यालय अनारमनीका डीएसपी विजय श्रेष्ठ नेतृत्वको टोलीले थप अनुसन्धान गरिरहेको छ । प्रारम्भिक अनुसन्धानले अजय लामो समयदेखि लागुऔषध कारोबारमा संलग्न रहेको देखाएको छ ।

























